Акафист преподобному Алексию Голосеевскому

                Краткая преамбула
   Два дня назад 24 марта 2017 года исполнилось 100 лет со дня преставления преп. Алексия Голосеевского, мощи которого были обретены в 1993 году. В конце прошлого, начале этого века они находились в домовой церкви митрополичьего дома, к сожалению снесенного ныне. Мне очень памятны благодатные службы, проходившие в возрожденной обители, где преподобный прожил более двадцати лет.По благословению своего духовного отца митрофорного прот. Михаила Бойко(1924-2003) я написал акафист глубоко почитаемому мной святому. Сознавая свой недостаточный опыт, точнее его отсутствие в подобном деле, и не претендуя на авторство, я посылал текст в Симферополь прот. Георгию Северину. Этот опытный пастырь, почивший в 2007 году, был настоятелем храма Трех Святителей и благочинным Крымской епархии, известен как автор акафиста свт. Луке Войно-Ясенецкому. Протоиерей Георгий одобрил мою инициативу и вернул мне акафист где-то через полгода с существенной правкой кондаков, икосы остались без изменения. Частично я восстановил изначальный текст, поскольку на мой взгляд нарушалось единство стиля. Прошло уже более тринадцати лет с того времени, как я вручил акафист настоятелю Голосеевской Пустыни архим. Исаакию. По его словам, акафисты утверждает специальная комиссия Синода УПЦ. Поскольку до сих пор никаких подвижек в этом направлении не произошло, думаю, что могу предоставить его благочестивым мирянам для келейного чтения.

Кондак 1

Избранный угодниче Христов и претеплый о нас пред Богом заступниче, пастырю добрый и учителю благочестия; кротостию и терпением, любовию и щедродаянми аки светило просиявый, хвалебное пение восписуем ти, чтущии святую память твою. Ты же, яко имеяй велие дерзновение ко Господу, от всяких нас бед и скорбей свободи, да зовем ти: Радуйся, преподобне отче наш Алексие, дивный молитвенниче и богомудрый наставниче.

Икос 1

Aнгели и праведных души на небесех о тебе, блаженне отче, возрадовашася, ангельский бо чин восприявши, ангельское житие явил еси, душу твою ризою добродетелей осенил, словом и житием  верных наставляя. Сего ради с умилением взываем ти сице:
Радуйся, Воронежским архипастырем Антонием, яко Божий слуга предреченный.
Радуйся, в древнем Киеве - граде на святую Пасху рожденный.
Радуйся, рождением твоим исполнивый обетование.
Радуйся, заповедям Христовым усердное послушание.
Радуйся, священства, инок и мирян преискусное окормление.
Радуйся, Лавры Печерския и обители сея святое украшение.
Радуйся, преподобне отче наш Алексие, дивный молитвенниче и богомудрый наставниче.

Кондак 2

Видя голубиную кротость и доброту души твоея, Человеколюбец Господь избранным сосудом Своим сотвори тя и дарами Духа Святаго ущедри преизобильно. Ты же молитве и службе Божией бодренно прилежал еси и ум свой богомыслием возвышая, присно воспевал  Господеви ангельскую песнь: Aллилуиa.

Икос 2

Paзум богодухновен имея, преподобне отче, измлада вся красная мира сего презрел еси. Сия ведущи блаженный старец Феофил, узрев тя отроча богоизбранное в ограде Китаевой пустыни, иноческий путь предуказа ти, и провидя, паки пронарече яко быти тебе Христовым служителем. Мы же, дивящеся сим чудным обетованиям, умиленным серцем вопием ти:
Радуйся, святителем Митрофаном, аки звездою светозарною ведомый.
Радуйся, смотрением Божиим  немотою пораженный.
Радуйся, благочестие матери твоея Марии восприемый.
Paдуйся, сладость попечения  и заботы о ближних вкусивый.
Paдуйся,  воинскаго поприща царя земнаго  избегнувый.
Paдуйся, на стезю доблестнаго воинства Христова управленный.
Радуйся, преподобне отче наш Алексие, дивный молитвенниче и богомудрый наставниче.

Кондак 3

Сила любви Божией проявися на тебе, преподобне отче Алексие, егда избавлен был еси Господом от недуга. Скорбящей матери о твоей немоте повеле святитель Киевский Филарет уповати на Бога, усердно молитися и раздаяти милостыню. Послежде в  день Пасхи Христовой приити со отроком в его келейную церковь, дабы вкупе с народом Божиим, утверждающеся надеждою, воспети воскресшему Спасителю: Аллилуиа.


Икос 3

Имеяй в душе упование истое на Иисуса Христа, премудрый Алексие, исцеление чудесне приял от Воскресшаго Господа: по скончании бо бдения благослови тя крестом архиерей Божий и повеле святительскую его палицу облобызати, абие же по трикратном  Пасце вещанию владыки «Христос Воскресе!» отверзостася твоя уста, дабы велегласно отвещевати «Воистину Воскресе!». Темже и мы, благодаряще Господа о таковых благодеяниих, воспеваем ти сице:
Paдуйся, в скорби сиротства щедроты Отчия обретый.
Paдуйся, со тщанием послушанию в Лавре прилежавый.
Paдуйся, старцев святых окормление яко многоценный бисер приявый.
Paдуйся, аввам преискусным себе до конца предавый.
Paдуйся, ум твой  изрядными знаниями обогативый.
Paдуйся, и душу свою незапятнану страстьми сохранивый.
Радуйся, преподобне отче наш Алексие, дивный молитвенниче и богомудрый наставниче.


Кондак 4

Буpи греховныя избежав и страстей буйныя волны безвредно прошед, преподобне отче Алексие, в благоотишие послушания водворился еси, разделяя труды со святителем Киевским в  раздаянии милостыни неимущим. Нищии же и убогия возвеселившися воспеваху Богу: Аллилуиа.

Икос 4

Слышaл еси, отче Алексие, дела милосердия и труды благочестия Святителя Николая и пламенно подражати ему возжелал еси. Темже, добронравное отроча,  с архипастырем Киевским посещал еси домы убогих в нощные часы, тайно милостыню творя. Мы же, дивящеся сему достохвальному твоему послушанию, ублажаем тя сице:
Paдуйся, от утра жизни твоея благое иго Христово на рамена приемый.
Радуйся, злато во черви по слову архипастыря вменивый.
Paдуйся, вдов и калек милостивное снабдение.
Paдуйся, душеспасительнаго нестяжания верное зерцало.
Paдуйся, печальным и скорбным утешение всегда приносяй.
Paдуйся, сляцаемых тяготами неиждеваемою любовию Божиею утверждаяй.
Радуйся, преподобне отче наш Алексие, дивный молитвенниче и богомудрый наставниче.

Кондак 5

Богохранимая обитель Лаврская взрасти тя, яко  в объятиях матерних. Обаче новое сиротство постиже тя, отче Алексие, егда благочестивии пестуны твоя старец Парфений  и  архипастырю Филарете ко Господу отыдоша. Но, напитанный благоуханным цветом духовных их наставлений,  ты смиренно нес послушания монастырския, поя Вседержителю Богу: Aллилуиa.

Икос 5

Видя юношу, восходящаго лествицею Богоугождения, потщался исконный враг кознями и прельщеньми восхитити тя от святыя обители, послав жену некую испытовати твою ревность ко Христу и целомудрие. Ты же юродивым странником Иоанном Босым благовременно увещанный бегати женского полу яко огня, вся прилоги лукаваго змия отринул еси, чаемого же иноческого подвига сподобился еси. Сего ради, дивящеся юношестей крепости и нелестному разуму твоему, вопием ти таковая:
Paдуйся, вся скорогибнущия блага мира презревый.
Paдуйся, душею к сокровищам неветшающим прилепивыйся.
Paдуйся, целомудрия и чистоты страже недремлющь.
Paдуйся, в скорбех и искушениих адаманте несокрушим.
Paдуйся, честныя мощи Печерских угодников с любовию лобызавый.
Paдуйся, в Селениих Горних с ними ныне веселяйся.
Радуйся, преподобне отче наш Алексие, дивный молитвенниче и богомудрый наставниче.

Кондак 6

Пpоповедник добродетельного жития явился, преподобне: кротость, незлобие, смирение в сердцы твоем твердо насадил. Темже, видяще твое усердие и духовное преуспеяние, чиноначалия обители удостои тя сана иродиакона. Сам же святитель Николай в благознаменитый день праздника своего повеле вне чреды облещи тя благодатию священства. Да сподобишися совершати Безкровную Жертву и непрестанно Господеви воспевати песнь хвалы: Aллилуиa.

Икос 6

Возсиял еси, богоугодным и ангелоподобным житием твоим, святе Алексие, егда ризничное послушание благоговейно несл еси, в воздыханиях слезных и молитвенных бдениях дни и нощи препровождая, темже Печерским угодником уподобился еси, их же святыя мощи блюдя со тщанием облачаше на всяко лето. Мы же, почитающе велии подвиги и труды твоя, глаголем сице:
Paдуйся, чудныя добродетели благоискусно стяжавый.
Paдуйся, святителя Николая покров снискавый.
Paдуйся, угодником Печерским служителю верный.
Paдуйся, благодатию Божиею  изрядно напоеный.
Paдуйся, убогих странных заступниче, теплейший.
Paдуйся, в уделе Богородицы шафран процветый.
Радуйся, преподобне отче наш Алексие, дивный молитвенниче и богомудрый наставниче.

Кондак 7

Хотя достойно заповеди Господни соблюсти, себе ни во что вменял еси, смиреннейший боголюбец. Обаче, служа у престола Божия в священном сане, преславных видений пред Святыми Дарами сподобился еси: старца бо юродивого Паисия  лик узрел еси светозарным, яко же Мотовилов преподобного Серафима Саровского осияннаго  видех. Сему мы, грешнии, чудяхуся поем Богу: Аллилуиа.

Икос 7

Новых грозных испытаний на державу Российскую пришествие провиде, досточудне Алексие, егда Господь открыл ти императора Александра грядущую кончину. В день бо оныя, священную проскомидию совершающе, обрел еси, преподобне, частицу за царя исторгнутую не светлой, но яко вином упоен, и исполнися скорби уведев Государя убиение. Сим велиим знаменем дивящеся, воспеваем ти сице:
Paдуйся, сокровищ несказанныхъ Духа Святаго исполнен.
Paдуйся, яко земля благая, плод сторицею произрастивый.
Paдуйся, всяк путь неправды возненавидевый.
Paдуйся, стопы своя по словеси Господа направлявый.
Paдуйся, орле, ум свой от земных к небесным возносивый.
Paдуйся, Божественного Света сияние неугасимое.
Радуйся, преподобне отче наш Алексие, дивный молитвенниче и богомудрый наставниче.

Кондак 8

Стpaнника, взыскующего тесных врат и подъявшего крест равноангельного подвига, невозможе терпети тя древний человеконенавистник и, явльшеся ти в некий день у раки Исаакия затворника, идеже мощи святаго облачаше, устрашити восхоте: тма бо сгустися окрест, и глава сего змия, непрестанно многия зверовидныя видения приемля из пасти  огнь испущаше. Обаче ничесоже достиже лукавый, предстах пред тобою и рекл: «Ты мя своим смирением побеждаеши…». Мы же, дивящеся твоему мужеству, вопием дивному во святых Богу: Aллилуиa.

Икос 8

Весь горя злобою, воздвиже на тя, преподобне, диавол двух девиц-сестер, внеуду благочестивых, внутрьуду же коварных и неблагодарных. Лжу бо и хулы начаша глаголати на тя, святый отче, и безчинства творити в Велицей Церкви, егда ты в оней служил еси. Видя сию брань от дерзких жен производимую, удалиша тя Лаврское начальство в Спасо- Преображенскую пустынь. Мы же, почитая  скорби твоя, и дивящеся кротости и смирению  умиленно взывaем сице:
Paдуйся, в Велицей Церкви, «небеси подобной», жертву Богу приносивый.
Paдуйся, исконного врага смирением и кротостию победивый.
Paдуйся, мглу неправды светом любви Христовой разгнавый.
Paдуйся, крине, от прилога лукаваго неврежден.
Paдуйся, безчестия и досаждения безропотно претерпевый.
Paдуйся, златица, огнем искушений очищена.
Радуйся, преподобне отче наш Алексие, дивный молитвенниче и богомудрый наставниче.

Кондак 9

Всех ведый ко Христу, благодати и смиренномудрия преисполнен бысть, блаженне отче Алексие. Бисере бо многоценный обретаху в тебе братия Голосеевския пустыни,  имже Господь дарова тя на многая лета, яко чадолюбивого отца и присно горящую лампаду Святаго Духа. Ныне же мы, честныя твоя мощи почивающие зде лобызающе, возносим Богу благодарственное пение: Aллилуиa.

Икос 9

Витии многовещаннии не возмогут изрещи, преподобне отче Алексие, похвалы  высоте доброплодныя души твоея. Святителем бо Петром Могилою содеянную в глухоманных дебрях пустыню прославил и облагоухал еси подвигами твоими, великий угодниче Христов. Сего ради воспеваем ти сице:
Paдуйся, кротость и смирение в душах насаждавший.
Paдуйся, пользе страданий и терпению учивый.
Paдуйся, яко странных прелюбезно и усердно питал еси.
Paдуйся, яко убогим щедро милостыню раздая.
Paдуйся, постниче сугубый, тем, «что Божия Матерь дает», насыщавыйся.
Paдуйся, земный ангеле, люботрудно и в старости маститей подвизавыйся.
Радуйся, преподобне отче наш Алексие, дивный молитвенниче и богомудрый наставниче.


Кондак 10

Спасти хотя овцы твоя словесныя, любвеобильный пастырю, деннонощно бдел еси стерегий стадо духовное, душу свою по заповеди Иисуса Христа положити готова: да не погибнет  овча некая во тме от волков хищных. Сего ради и мы, на предстательство и помощь твою уповая, вопием Богу: Aллилуиa.

Икос 10

Стена и прибежище необоримое к тебе притекающим был еси, отче Алексие, молитвы бо твоея  велия сила и до ада достизаше. Чадо бо твое духовное Иоанн, преслушав совета отчего поговети и причаститися ко дню своего Ангела, внезапу утопе в Днепре и абие, в сонном видении явльшеся, моляше тя избавити его от блуднаго прегрешения, яко связан есть лукавыми духами. Ты же, милостивый отче, разрешительную молитву сотворив, избавление юноше оному даровал еси. Сему велию чуду дивящеся  во умилении взываем:
Paдуйся, благодатию Божиею вся взывающие к тебе одождивый.
Paдуйся, загробную участь духовного чада во спасение преложивый.
Paдуйся, кокош, православных от вражиих когтей покровяй.
Paдуйся, обильныя слезы покаяния даяй.
Paдуйся, безчисленныя разрешивый недоумения.
Paдуйся, впадших в нечестие благое вразумление.
Радуйся, преподобне отче наш Алексие, дивный молитвенниче и богомудрый наставниче.


Кондак 11

Пением всеумиленным и хвалением ублажати тя, старче Алексие, достойно есть. Ты бо  крепкий предстателю за живых и мертвых явился еси. Понеже и святии познаху силу благомощных молитв литургийных тобою творимых: святитель бо Феодосий, явльшийся ти во граде Чернигове, заповеда поминати на проскомидии родителей своих. Сего ради, с верою и любовию почитая память твою, вопием Богу: Aллилуиa.

Икос 11

Светом божественным просвещаем, угодниче Божий, грядущая, яко настоящая и дела людския греховныя зрел еси. Не утаися от тебе, духовного отца, и послушник Николай, егда тайно в гору Афонскую отиити восхоте. Предуведевше же самочинное желание, ты юношу сего к покаянию слезному привел еси и такожде скорое возвращение русских иноков от Святыя Горы предсказа; таковому дару прозорливости чудяхуся, глаголем ти сицевая:
Paдуйся, людских судеб тайнозрителю.
Paдуйся, тайныхъ золъ обличителю.
Paдуйся, игуменство матушке Евфалии за седьм лет предуказавый.
Paдуйся, времена жития многих человек предзревый.
Paдуйся, киевских архипастырей до одра смертнаго окормлявый.
Paдуйся,  митрополита Владимира-священномученика отрадо.
Радуйся, преподобне отче наш Алексие, дивный молитвенниче и богомудрый наставниче.


Кондак 12

Блaгодaтию Божиею свыше осененный, преподобне отче, знал еси день отшествия твоего ко Господу и известил о сем братию. Такожде расточил еси скудное имение свое с любовию и увещаниями. Настави и нас на стезю спасения, да соблюдем сердца неврежденна от стрел и сетей вражиих и в сиянии присносущного света в чертог Вседержителя внидем, поюще Ему: Aллилуиa.





Икос 12

Воспевающе праведное и многочудное житие твое, отче Алексие, ублажаем твоя молитвенныя бдения, милосердныя щедродаяния, благодушное несение скорбей, унылых и немощных  душ ободрение и восхваляем тя сице:
Paдуйся, лучами подвигов монашеское житие озаривый.
Paдуйся, Христу возлюбленному душу блаженно предавый.
Paдуйся, Царствия Небесного и славы вечныя наследниче.
Paдуйся, преподобных и праведных веселия сопричастниче.
Paдуйся, яко всем дары целебныя щедро изливаеши.
Paдуйся, яко град и отечество наше присно защищаеши.
Радуйся, преподобне отче наш Алексие, дивный молитвенниче и богомудрый наставниче.


Кондак 13

О, пречудный и блаженный  угодниче Христов, преподобне отче наш Алексие! Приими милостивно сие малое похвальное пение, от нас, недостойных, обаче с любовию чтущих тя. Умоли, преподобне отче, Создателя и Спасителя нашего избавитися нам от всяких бед и напастей, веру правую укрепи, мир, тишину и согласие в сердцах утверди, крест скорбей земных помози в благодушии понести, вящше же сих Царствие Небесное улучити испроси, да с тобою вкупе сподобимся вечно пети  Господеви: Aллилуиa.

(Сей кондак глaголи тpижды, а по сем читaется икос 1 и кондак 1)

МОЛИТВA
преподобному и богоносному отцу нашему
Алексию Голосеевскому

О, богоблаженне угодниче Божий, преподобне отче наш Алексие, Голосеевския пустыни похвало и пажити Богоматери предивное украшение! Ты, славный угодниче Христов, добре  подвизався еси в трудех, постех, в смиренных молитвах и неусыпных бдениих. Темже, с верою и умилением припадая к раце честных, цельбодательных мощей твоих, молим тя: помози благовременно омыти слезами покаяния грешныя души наша и мирныя христианския кончины  сподобитися чадом твоим. Испроси нам у Господа, богомудрый пастырю, избавления от душевредных страстей и немощей телесных, утверди ны в духе любве, терпения, милосердия, щедрости и ревности ко спасению ближних.
Ей, великий старче и угодниче Божий! Не даждь нам впасти в уныние от тяжких искушений, горьких скорбей и хитросплетенных козней лукаваго. Сохрани Святую обитель сию и души наша от тлетворного дыхания мимолетного века сего. Да сподобимся благомощным ходатайством твоим наследницы быти вечных благ и причастницы присносущныя радости во Царствии Господа нашего Иисуса Христа, Емуже со Отцем и Святым Духом подобает слава, честь и поклонение во веки веков. Аминь.