Вучиз Сеферал ч1ар къвезвач?

Кимел кавалар галаз ацукьна, яшар хьанвай итимри ихтилатар ийизвай. Са  арадилай, абурун къвалавай салам гана, са пуд йикъан чуру квай,  бармакдин къеряхрилай ч1ар фенвай  са итим фена. Муса бубади, адан гуьгъуьнай килигиз - килигиз, къвалав гвайбурухъ элкъвена  «Я стхаяр, ц1уд йисалай гзаф я Сефера хпер хуьз. Адахъ галаз чубанвал ийиз эгеч1айбуруз  к1валер-къар, машинар ва пулар хьанва. Бес и Сеферал «ч1ар мус къведа»? -  лагьана хабар кьуна.  «Къенин йикъалди адаз я к1вал авач, я хзан хьанач, гъайи свасни чара хьана хъфена. Вичини гагь са бригадирдихъ галаз, гагь масадахъ галаз чубанвал ийиз ава». - давамарна Муса бубади.
«Сефер, кьве йисуз, хпер маса гана  Худатай са паб ахкуна, гьана яшамиш хьана. Ахпа гьа пабни туна, элкъвена мад хуьруьз хтана. Бубайри лугьурвал - пара къекъвей чантада фу жедач!» - Али бубади вичин къарар малумарна.
«Я стхаяр -  лагьана элкъвена Ягья муаллимди, - гзаф вахтара итимдин агалкьунрин къадар-кьисмет хъсан хьун - са зегьмет ч1угунилай ваъ, адан хесетрилайни аслу я. Хъсан хесетар хьайила, ваз инсанрин арада гьуьрмет жеда. Мад квез чида хьи, - ацукьнавайбурулай вил аладарна муаллимди, - гьуьрметдилай еке девлет и дуьньяда авайди туш. Гьуьрмет хьайила ви бармакдин къеряхдал ч1арни жеда, лап алачиз хьайит1ани, а кардиз фикир гудай кас бажагьат жигъида. Амма са к1валах ава – гьуьрмет къазалмишун хпер хуьнилай к1усни регьят к1валах туш».
«Гьуьрмет – давамарна  мадни Ягья муаллимди, -  инсанрин, хуьруьнвийрин ихтибарди арадал гъизвай шеъ я. Ихтибар – земзем булахдин  циз ухшар я – адан гьар са ст1ал багьа я. Са къапунавайди к1ват1ун, акун четин кар я, амма гъил геляна экъишун – регьят!»
«Са вад-ругуд йисан идалай вилик, Сефер гьеле жегьил чубан яз, - ихтилатдив  эгеч1на Халид буба, - Сеферан халуди адал са ихтибардин к1валах тапшурмишна: зулухъай, хпер Азербайджан патахъ, Мугъандин къишлахдиз тухудайла, ада вичин са кьар, гатфариз элкъвена хкведалди суьруьдик кутун минетна. Кьар са ни ят1ани халудив вахканвайди тир, гьайван яхун яз акуна, тук1уначир. «Башуьсте халу!»  -  лагьана, Сефера к1валах вичин хивез къачуна. Амма рекье, Билиждин ракьун рекьин станциядив агакьдалди, ял ягъиз акъвазай  са чкадал ада  халудин к1ел тук1уна, птулка эрякьни арадал акъудна, са гъвеч1и межлис туьк1уьрна. Галай юлдашриз, вичиз туьгьмет тавурай лагьана, гьайван вичинди туширди чирнач. Гатфарихъай  хуьруьз хтайла, Сефера халудиз, адан кьар п1ирел фейила тук1ун хьайиди, хабар гана. Халуди «Гьалал хьурай, чан хтул!» лагьана жаваб гана. Гьа иналди, адахъ халудин патай авай ихтибардин суьрсетни куьтягь хьана».
«Эхь, аквар гьалдай Сефер ихтибардин ст1алар к1ват1уник квачир,  са гьик1 ят1ани, вичиз хабар авачиз к1ват1 хьайи вад ст1алдин аявал тежер инсанрикай я. Ихьтин инсандин я бармакдин къеряхдал, я  вичел «ч1ар атун»  мумкин к1валах туш» - лагьана Ягья муаллимди, ихтилат гьа инал акьалт1арна.