Кьегьал яни, усал?

Зи азизбур! Квез инсан дуьньяда авай маса шейъерилай - гьайванрилай,тамарилай, рагарилай, …, квелди тафаватлу ят1а чидани? Инсандиз аллагьди артухан, кьет1ен ихтияр ганва. Уьмуьрди йикъа  вилик эцигзавай гьар са суалдиз  къвезвай са шумудни - са  жавабдикай,  аллагьди инсандиз - вичин рик1из к1андай жаваб хкядай мумкинвал ганва.  Ихьтин мумкинвал инсандилай гъейри и дуьньяда са куьнихъни авач. Чаз, инсанриз, икьван еке ихтибар авун – им аллагьдин патай чи дережа хкажун, чаз са т1имил кьван вичиз мукьва жедай мумкинвал  ганва, лагьай ч1ал я.
Инсандин виридалайни еке алакьун – анихъ галайдакай фикир ийиз хьун я, масадан дердиникай рик1ивай хабар кьаз хьун я, к1еве авай касдиз жедай са куьмек гун я. Гьа ихьтин крариз вичин уьмуьрда чка гузвай кас – Кьегьал инсан я. И кар алакь тийидайбур, яни масадакай фикир тийиз са жуван руфуниз, чандиз къуллугъ ийидайбур – усал инсанар я.
Гила куьн гъавурда акьуна жеди, вучиз аллагьди чаз жавабар хкядай мумкинвал тунват1а?  - Кьегьалар вужар ят1а чирун патал! Эхь аллагьдизни Кьегьалар пара к1анда!
Лезги, фикир це, вун гьибурукай я? Кьегьал лезги яни, тахьайт1а усал?