Ну ц1акьсира илбагьандан бархьсира

Ишди бурхIназиб Америкала президент Дональд Трампла гъайличил: «Ну бегIлара цIакьсира, ил багьандан бархьсира», - ибси пикри, Америкали лебил дунъяла халкьлизи иргъахъули саби.

УркIи-уркIиларад кьабулли ахIенра ишди бурхIназир Америкали ва иличил барх Израильли Иранна халкьличи дяхIчиаибти зулмуртачи.

Даршани самолётуначил, ракетабачил, халаси цIакьла ярагъличил чучиб сегъуналра гIяйибагарти халкь бомбалабирни, Америкали дунъялизи тIинтIдарес дигути, сегъунти-дигара диаб, бархьдешли, яра демократияли мардарес хIебирар. Дунъяла тарихлизир Ближний Востоклизирти ишбархIила тяхIяр-кьяйда цIакьла бегIтани цIакь агартачи бяхIчиаибси зулмукардешван кьабулдиру, бархьдешличи кабизурти адамтани, лебилра дунъяла тарихлизир иманагардешлизи халдарили кавлан.


СССР бехъубхIейчирад капиталистунас чус дигутани биркьес имканти акIубли сари, илдала баркьудлумани дунъяла халкьла гIямрула дурхъадеш, бархьдеш, адамтала ургарти адамдеш багьа агардирули сари.


Давла бучес багьандан илдани, вершадеш дирули, наркотикуни, чисалра хIяжатли ахIенти вакцинаби дирцули, адамти кабуршули, дургъби адилкьули, улкни дехъубли (мисаллис буралли гIярабла, бусурмантала улкни) илар Граждан дургъбира палакатдешра кавлахъули сари.


ИшбархIи нушази сагати хабуртазибад бурули саби: «ГIярабла улка Ливияли Иранничил дургъби дехIдихьили сари». Нуша пикридикIулра, бусурмантала ургабра бархьдеш, цадеш агара, илдачибра гIяйиб бургар или.


Ливияла ГIярабла улкализи 2011 ибил дуслизиб НАТО-ла гIярмия бухIнаберхур, улкалис гьуни чебиахъуси Муаммар Каддафи кавшиб, илабси социалист улка пашбехъахъуб, халкьла ургар граждан дургъби адикьур. Граждан дургъбазиб цабехIли-цабехI кабуршули Ливияла халкь гьаннара лебал. Чили сабил, хъям-кьацIлизиб илдала улкала набт арбихули саби, Ливияла халкь биалли къарциндешлизиб саби.
Ишди бурхIназив, 53 дус виубси Муаммар Каддафила урши Сейф аль Исламра сунела юртлизив, белгили ахIенти адамтани кавшили сай. Илини 2021 ибил дуслизиб улкалис бекI виркIути выбортазиб сунела у гьалабихьибсири, амма халкьла ургабси бижгурдешли выборти дурадеркIахъес датурти ахIенри. Сейф аль Ислам сунела улкализир граждан дургъби тIашаэс хьуликIусири. Ил кавшнилизир Францияла президент Э.Макронна къел лерниличила дунъяла сагати хабуртазиб бурули саби.
Иракьличила гъайикIалли – 2003-ибил дуслизиб Америкала гIярмияли улкалис бекIдеш дируси Саддам ХIусейн, дунъяла тарихлизиб агарсигъуна зулмукардешличил кавшиб. ИлхIейчирад улкализир цабехIли цабехI кабуршути дургъби тIашдилзули ахIен. Улкала халкь саби-ургабси бижгурдешлизибад, рушбатчидешлизибад дурабухъес хIебирули гьаннара лебал. Илдала ванзала давлумачил пайдалабикIутас лерил секIал далдикили сари.


Илдачи мешути тяхIяр-кьяйда сари Сириялизирра. 2024 ибил дуслизив улкалис бекIдеш дируси Башар Асад, къаршикартани сунечи уркIецIи хIебирни балули, Россиялизи вакIиб. Улкализив бекIдеш дируси агниличил пайдалабиубли, Израильла гIярмияли Сирияла гIярмияла лерилра цIакьани тIутIукьякьядарили, пяхIли детахъахъиб. Улка сегъуна даражаличи дурабулхъанал гьанналис белгили ахIен. Сирия, бусягIятла замана саби батахъес дявила цIакь агарсили бетаурли саби.


Америкаличил далдикили дузути ГIярабияла улкнала даражаличила гъайикIалли, илабси даражара гапла ахIен. Илди улкни - ОАЭ, Саудунала ГIярабия, Катар, Кувейт цархIилтира бусурмантала улкни Аллагьли бедибси давлали, ванзализибси цIудара набтли давлачердарили сари. Амма илдани чус Аллагьли бедибси давла, мурталра-декIар, бусурман динна тIалабуначи балбикахъили пайдалабирули ахIен. Улкнас бекIдеш дирутала мургьила самолетуначила, гамурбачила, дебали дурхъати ва дахъал машинабачила багьахъниби сагати хабуртазир дакIудирули сари, къияндикибти бусурмантас кумекбарниличила селра аргъес вирули ахIен. Илди улкназиб бекIдеш дирутала ургаб цаличилцала давлачебдешлизиб абз ахIенси, саби-ургаб балгундеш агара. Илди капиталистунала юлдашуни саби, капиталистунас гIяхIдилзути секIал илдасра гIяхIдилзули сари. Мисаллис буралли, ГIярабияла Эмиратуназиб бегIлара ахъси юрт тIашбатес, бегIлара халаси аквариум барес, бегIлара халаси вавнала авлахъ барес, цархIилтира лерил секIал илдигъунти детаахъес пикрибикIули саби. Бусурман диннизиб бурни хIясибли, давла адамтала хIял багьес бедлугуси саби, илра бархьси шайчиб харжбарес гIягIниси саби.


Ну лебтачибра гIяхIсира бикIуси илбислис бетаурси Америкалисра, илала юлдашуни детаурти гIярабла улкнасра бетарниличи рирхулра, цадехI, яра кIидехI адамла гIямрулизиб бархьдеш чедихIебикалра, ахирра-ахир сеннира бархьдеш чедибиркур. Израильлис гьуни чебиахъуси Б.Нетаньяура сунела буйрухъличил кабушибти халатала ва биштIатала бунагьла цIали игниличи рирхулра.


Чили дархьаллира, дунъяличи дархьибти зулмурти къел-хIерзи агарли детихъути ахIен, илдас сеннира танбихI гIеббиур. Гьанна СССР агара, Аллагьла кьудратра, илала амру бихули хIербирути адамтала гIяхIти пикрумира чилилра урдяхъес хIебирар. ГIяхIти пикрумани ва баркьудлумани дунъяра ахIерабиру.
ДунъякIун давлаличиблира, цIакьличиблира бузуси ахIен, ил бархьдешличиб бузуси саби. Бархьдеш сеннира чедибиркур.