Илди арц сеннира харждирар

Нушала халкьла дахъал зигаръала лер маршруткаби, автобусуни дахъ дицIили дашниличила. Зигаръалара дархьти сари, савли-бархIехъ илди, тIашизес мер агарли дирцIули сари.


Амма бурес рирус, автобусличиб чус хIяжатси мерличи баили, гьунила багьа хIелугути анцIбукьунира нушачир къаршидиркули сари. Автобусуначир багьахъниби лер гьаларти унзализибад халкь абицIахъес жибирути. ИлхIелира бухIнабулхъухIели багьара бедахъес дигули бургар. Амма нушала халкь гьаларти унзализибад абицIули ахIен, имцIаливан гьаларти унзализибад кабицIули саби ва гьунила багьа бедлугули саби.


ГIяхIцад адамти дайларти, гIеларти унзализибад кабацIили багьа хIебедибти анцIбукьуни дила хIулбани чедиули рирус.


ИлхIели гьарил багьа хIебедили кацIибсини бунагь бирули сай ва нушала шагьар бунагькарси бетарули саби или пикрирулхъули рирус.


Чисалра гьанмабикаб чила-биалра барибси бунагь чехIебаили, пикрихIебарили кавлуси саби или. Адамтала гьарил пикри, гьарил баркьуди, гьарил гъай чебиуси, пикрибируси ва бархьдешла умцантачиб умцуси левли виъни хIекьдеш саби. Бусурман диннизив ил ЧевяхIси, гьарил секIал чедиуси, мусни-зубри дузахъуси Аллагь сай. Гьаннала замана халкьли дузахъути технологияби агарси замана, наб гьанбиркусири лебилра адамтала, лерилра баркьудлуми сеналра пикрилизи касес хIейрар или.


БусягIят дузахъули лерти адамтани акIахъубти лугIурбала технологиябала кумекличил гьарил адамла вайтира гIяхIтира белгидарес имканти лерхIели, Кьудратла ВегI Аллагьла илдачирра, нушани пикридарес хIейэсли гьаладяхI ардякьунти, гьарилла баркьуди пикрилизи кайсути, халаси кьудрат чузиб лебти имканти лерли диъни кьалли хIекьдеш саби. Ил багьандан, автобуслис багьа хIебедили ахIерабарибси къуруш, кIирка-хIябкали зарал бетаурли, цархIил мерличиб харжбируси биъни, гьариллис багьес чебиркур. Дунъя илкьяйда бузули саби, бахъал халкьлис, гьаннала замана, илгъуна хIекьдеш якьинбирули саби.


Автобуслис хIебедибси багьацун ахIи, гьарил хIялалли ахIенси баркьудилис, балкIси пикрилисра гьариллис жавабкардеш дихес чебиркуси биънира хIекьдеш саби. СенахIенну Аллагьла каламлизи белкIи саби: «Гьарил баркьуди кьиматлабируси саби барибсила кьас ва пикри хIясибли. Гьарилли сунени сархес пикрибарибсира сархули сай».


Илкьяйда бетарули саби адамтала гIямрула лерилра шалубачиб. Дунъя гьарил шайчиб бархьдешличиб (справедливость) бузули саби. Бархьдеш кабизахъес адамла гIямру хIедаибти анцIбукьунира къаршидиркули сари, амма сеннира, ахирра-ахир бархьдеш чедибиркули саби. Ца вархьси адам сунезив левли виалли Аллагьли лебилра ши ахIерабирули сай. Лебилра бунагькарти биалли, илдала челябкьла бетарули ахIен.
Автобусунас багьа бедлугниличила гъайрикIасли лебилра илдачи кабирутани багьа бедлугалли, илди хайриличил дузалли, халкьлис хIяжатдиркутала кьадарлизир автобусуни дакIудирар или пикририкIулра. СенахIенну гьар-чинабалра хайриличилси бузери гьалабяхI арбашуси саби.


Бахъал халкьли диштIати бунагьуни дирули, шагьар бунагькарси бетаурли хIейгахъира. Ил нуша хIердируси, нушала гIямрула бурхIни дуркIуси мер саби. Илди гIямрура гьачам сари лугути ва тикрардарес вирули ахIен. Лебил халкьла хIялалдеш алавчарси дунъяличи тIинтIбирули хасти, дигести нур (аура) алкIули сари. Илди, бахъал адамтала хIялалдешли акIахъубти нурлизир нуша хIердирулра. Бунагькарти бахъбаалли, сунезиб баракат агарси бунагьла нур (аура) бетарули саби. Нуша баракат агарси мерличир хIердиэс чевкъули саби.


Илдигъунти, ну-регIти пикруми хIушачил дуртIулра. Рахли дархьти хIедиалли, хIушара Аллагьра набчирад чердерхирая.