Дональд Трамплизи бурили дигахъира

Гьанна жумягIличибра имцIали Ближний Восток дергъла цIализиб саби. Дергъла цаибил бархIи Д.Трамплара Б.Нетаньяхулара халати такьсиртала кьурбунтили бетаур школализиб бучIути Иранна 165 рурси. Дявила ил хатIакIун чилилра селилра марбарес хIейрар.


Сецад лера гIурра илдигъунти – хатIаби ахIен, илди - такьсирти сари.
Секьяйда, сегъунти далилтачи хъарихъули океанна гIелабси Америка, нуни хIуша наб дигуливан хIердирахъура или, дявила ярагъличил бусурман улкнази бухIнабулхъухIели. Халкьани-ургар кадизахъурти кьяйдуртизибкIун гьарил улкалис   сунес дигуси тяхIярли хIербиэс ихтияр лебси саби.


Мартла 10-личирадти сагати хабуртазиб бурули саби, Америкали Иранна набтла мягIдунти дуцес асубирар. Се багьандан, сегъуна ихтияр леба Америкализиб илди дуцес? «Нуни ярагъличил Иранна набтла мягIдунти дурцис», - викIули сай Америкала президент. ИлкIун дунъяличиб бегIлара бархьсира бикIуси, халаси улкали, хъархIерагарси улкала лебдеш гъарали буцни саби.


Яра гьанна лебилра дунъяличиб цIакьсили цIакьагарсила лебдеш гъарали буцни бархьсилизи халбирулив?


Дональд Трамп, бахъалгъунти Америкала халкьли тIамри дедили, улкалис бекIли катурси, чIянкIли Украинализирти дявила аги-кьяйда хIябал бархIили тамандирис викIухIели сайри. Илини биалли се бирули? Америкала президент ветаурхIейчивад дусра кIел базра дикили сари. Дявила анцIбукьуни тIашаэс илини селра гIяхIси бирули ахIен, ил шайчив лебилра дунъяла халкьла бирхаудилизивад улхъули сай, цархIил шайчив биалли Ближний Востоклизир дунъяла хIябъибти дургъбала цIа адикьурли сай. Илала баркьуди селилра марбарес хIебирар. Духес хIейэсцад бунагьуни сунечи чесибси Б.Нетаньяхучил юлдашикили сай гьанна Д.Трамп.
Б.Нетаньяхула бунагьунала декIдеш жугьутIунала чеалкIути наслубазиб чебахъес хIебирули кавлан или пикририкIулра. Марли Америкалис бекIдеш дарес халкьли викIибси адамли иличила хI****улив?


Рирхес дигулра иш гьакIлисра дунъяличиб духудеш чедибиркниличи. Ближний Востоклизиртира, Украинализиртира дургъби тIашдилзниличи.


Европала хIякимти духули ахIен рикIира, илди Украина Европа саби бикIухIели. БалкIси секIас секьяйда вируси бархьси саби или кайзес. Лебил урусунала улкала тарих Киевла урусунала «Киевская Русь»-ла тарихличибад бехIбихьибси биъниличилакIун лебилра дунъяличиб балуси саби.


Гъарали белтIунси давлали чилра давлачевхIейру, илкьяйдали Америкара Ираннизибад кебасибси цIудара набтли давлачебхIебиру.


Бусурмантас Аллагьли, саби хIерли ахIенси мерличибад, илгъуна давла бедили саби, Америка, итцадра улка тебли, чула сен агарси илдала давла? Дила пикри хIясибли, илди бунагькарти сабхIели. Илдани, дебали духути, бархьти, цIакьти, урги-дергаличил бургъути Америкала минала халкь тупангуначил къирбарили, агарбарили, улка чули буцибсири. Чус давла бучес багьандан Африкала цIудара камла бегIти халкь бузахъутири. Америкализи гечбиубтира, бахъалгъунти, Европализиб танбихI чекахIесес багьандан гьаббухъунти такьсирчиби сабри.  Дунъяли, (вселенная), яра Аллагьли селра хъумуртули ахIен. ХIебирар илдала улкализиб сегъуналра баракат, рахли Въетнамлизир, Афганистайзир, Иракьлизир, Ливиялизир, Ирайзиргъунти такьсирти дирес гьаннара даимбиалли. Гьарил такьсирлис хIядурли танбихI кабихьили леб иш дунъяличиб. Гьарил такьсирра дунъяла тарихлизиб я хъумуртули, я бетихъули ахIен. Дигалра хIейгалра такьсирлис танбихI гIеббиули саби.


Бетихъули ахIен барибси гIяхIдешра, гIяхIси баркьудира, бурибси гIяхIси девра. ГIяхIдеш ва бархьдеш чедидиркули дунъя бузули саби.


Нура, рирхулра, нуван пикрибикIули саби лебил дунъяла халкьра, Дональд Трамп дургъби тIашаахъес багьандан халкьли президентли викIибсири. Сунени иличила хъумартурли виалли, дигахъира иличила, чили-биалра, илизи бурили.