Игитдешла багьа

Иш дусла июльла вецIличир цугли шел дус диркули сари, Дагъиста полицейскийли ДешлахIярла вацIализиб чебяхIси игитдешла гьунар дураберкIибхIейчирад. Ил полицейский хIябцIали дус виубси МяхIяммад НурбяхIяндов сайри. Савли сягIят шуличиб ДешлахIярла вацIализиб бизил гьанкIли бусути МяхIяммадличи ва илала узбикьуртачи хабарагарли къачагъуни чебухъи, илдала някъби-кьяшми дигьунтири. Шел къачагълис къаршидеш чебиахъуси гъудурти журабазив цацали вирхIнила шайчирти абзанала Россияла чемпион ГIябдурашид бусягIят кавшибсири. Каспийсклизив полициялизив узуси МяхIяммад гьаланачи кьукьубачи катур, гIур илизи «полициялизибад арбукьяхъес барх бузутачи телефоннизивад дугьаизи» бикIес бехIбихьиб. Се бирули душмай сунела бекIличи тапанча  бяхIчикаибси МяхIяммадли?..
Телефоннизибси видеолизиб ил анцIбукь чебаибси ва МяхIяммадли дурибти гъай дакьибси РФ-ла Президент В.В. Путинни, МяхIяммадла бегIтази чула уршилис Россияла Игитла Зубари бедлугухIели, ишди дугьби дурибтири, бикIар: «Дила гIямрура ургъаннагъунтихIели, нунира дахъал илдигъунти анцIбукьуни чедаибти сари, амма хIушала уршили чедаахъибтигъунти игитдеш чехIедаира. Гьарли-марси гъабза уили сай ил».
«Дузеная, узби!» - Россияла Игит МяхIяммад НурбяхIяндовла гIямрулизир бегIлара гIергъити дугьби сари илди. Газетабала, журналтала белкIаназир илди дугьбас гIергъи имцIаливан вявла ишара кабалтули бирар. Дила пикрили, ил балкIси саби: илар вявла ишараби диэс дирути ахIен, сенкIун баласра нуни: МяхIяммад НурбяхIяндовли итди кIел дев, гIяхIли пикриухъи, уркIилизир делкьи, саркъахъили, къалабахIейкIули, багьлали ва гIяшли  дурибти сари: «Дузеная, узби» («Работайте, братья»). ГIясивиубси адамли вяв-чIярикIули дурибти дугьбани адамтала уркIбачи илцадра асарбарес хIедирар.  Илди дугьби вегIла уркIила хIяйчи мешудикахъили, гIягIниси тяхIярли дурнилизиб саби М. НурбяхIяндовла  игитдешра чевяхIдешра. Ил багьандан сарри илди нушала улкала гьарил адамла уркIилизи даибтира. Наб гьандиркур «Дузулра, узи» («Работаем, брат») дикIути Россияла полицейскийтала жавабти. СМИ-базир илди дикьухIели, пахрули бирцIули бири дила уркIи…
Нуни дила биштIаси макьалалис «Игитдешла багьа» бихьилра. Ил багьандан ца-кIел дев игитдешла багьаличилара дурисра. Нушала улкала бахъал адамтани ВатIа хъархIерагардеш багьанданти дургъбазирра гъабзадешра игитдешра чедаахъибти сари. КайсехIе улкала тарихлизирад ца-чумал баян, мисал. Игитдеш ахIенрив гьатIи, душмайс мутIигIхIебакIили, мицIирли шинна уди арбякьунти «Варяг» крейсерла матросунани, поэт В.Маяковский викIуливан, поездла бугъала цIабилкьлизиб мицIирли цIали игути, мицIирли ванзализи хIярибирхьути, бацIахъибси къалай ва гъургъашин кьакла кертIули, бубкIахъути граждан дургъбазиб алхунти большевикунани дакIударибти («Живьем по голову в землю закапывали нас банды Мамонтова, в паровозных топках сжигали нас японцы, рот заливали свинцом и оловом»)? ГьатIира халати гъабзадеш чедаахъиб советский солдатунани ВатIа ЧебяхIси дергълизир: Брестла кIялгIяла гарнизонни, Александр Матросовли, капитан Гастеллони, комсомолка Зоя Космодемьянскаяни, Краснодон шагьарла «Жагьил гвардияла» бургъантани ва бахъал цархIилтани.
1993 ибил дусличибад бехIбихьили, РФ-ла духIнарти къуллукъунала кIидаршличиб имцIали хIянчизарлис Россияла Игитла у бедибси саби, илдазибадти дпршлим шуцIалицад ил уличи лайикьбикиб бебкIили гIергъи.
Сегъуна саби, гьатIи, илдала игитдешла багьа?
 Ца-хIябал дев дурисра МяхIяммад НурбяхIяндовла игитдешла багьаличила. Илала игитдешла багьа саби сунела неш-дудешлизивад, хьунуйзивад ва биштIати урши-рурсилизивад, сай акIубси «граждан дергъла бару, ахIерси Сергокъалализивад», ДешлахIярла вацIализивад, тухумтазивад, гъамтазивад, юлдашуназивад, сунес дурхъати секIайзивад сай мяхIрумиъни. Лерилра илдасра ва дахъал цархIилтасра «гIямру» бикIуси саби. ХIебиалли, МяхIяммад НурбяхIяндовла игитдешла багьа сунела жагьти гIямру сари. Ил тяхIяр саби цархIилти Игитуналара. Игитуналара, цархIилталаван, бебкIали гIямру ардихути диубхьар, илдас бебкIаагардешра бихуси саби. МицIиртани илдачила хъумуртуси ахIен.