Мурталра хIядуртири

ГIе, чучила нуни иш макьала лукIути дила кIелра юлдаш набчил барх гIяярличи бакIес мурталра хIядуртири: гIебшни биаб, яни биаб, савли-гIянручI биаб, дай дуги биаб. КIелра Кьялкнила школала бехIбихьудла классунала учительтири. Нуйчив шел дус халаси Къутнала ГIябдуллабек шила хьар дублав хIерирусири, шел дус нуйчив виштIаси ГIябдуллахIяжи – шила хъар дублав.
ГIябдуллабек дила дебали гъамси юлдашри. Авал дус илдала шилизив учительли узуси ну чуйнара ГIябдуллабекли сунечи хIерила укахъес укибсира. Рахли укьес кьабулхIеркаслири, ил набчи гьимуркIи. ГIябдуллахIяжи дила гьарахъси тухумра сайри.
КIелра илди дебали сахаватти адамти бири. Чуйнара бурибси саби нуни ва гIурра бурулра: кьялклантани гIяхIялла халаси хIурматбируси саби. Бурусилис мисалли гьануршисра гIяпабаркь Атила Адам (Ати Адамла нешла у саби). Чина ватиши ил гIяпабаркьли кьацIли хIевкахъи дуравад чула шилизи вакIибси адам! Сахаватти адамтала гьаларти къяяназив сай вахъхIи школала директорли узули калунси ДР-ла урибси учитель ГIябдулла ГIяхIмадовичра. Мурт шилизиб бебкIа биалра, ГIябдулла ГIяхIмадовичли вебкIибсила тухум-агьлу царилтачиб гьалаб кьацIли бахес бикутири, «валлагь ил наб  дудешла буйрухъ саби» викIули.
Рамсайчи гIямрура дигусигъуна чархлис арадешра габ ГIябдуллабекла хьунул Ажайлис. Бургар гIурра нушала дубуртазиб гIяхIти хьунри, амма Ажайгъунти бахъал хIебургар. Цайналра хIулбала хIерлилра яра дяхIла лишанлилра чехIебаахъиб илини шала хIедикили лерай чула хъули кадирути нура дила юлдаш Асадуллара сунес хIейгули диъни (гIяярличи аркьухIели ГIябдуллабекли сунечи хьурадирутири). Марлира, гIяхIси хьунуй саби мурулла хIурмат лебкуси.
ВахъхIи гIяярвашаси ну ГIябдуллабекличил варх. Бархьси саби, гьарил гIяяркьянасван, илисра дигахъи, гIяяр бацIсили убхIебухъи, се-биалра бикили. Амма селра хIебикалра, думкьхIедумкьи илала дяхI. «Шадибгьуни гIяхIси бетаур, - билзахъи илини. – ГьатIира гIяхIнагу жаниварти мицIирли кални». 
Бахъал гIяяркьянаби лебри ит янила бархIи нушачил барх: Уркарахълизибад, Мажалислизибад, Чумлила ва  ХIуллила шимазибад. Дахадаевла районна ГАИ-ла инспекторли узуси цIурхакан Аминов МяхIяммадли кибтири илди набчи. Нушани, Кьялкнирад дикили, ГIябдуллабекра варх укибсири. Кьялкнилара Гьунахъарилара шимала ургарти Духъяна шурмачи даили, илабад гIяяр барес пикрибарибсири. Нура ГIябдуллабекра хурачил датурли, гIелабти вецIалцад адам вацIакад уди чула номертачи гьайбиуб (гIяяркьяна калзуси мерлис номер бикIар). Лебилра  номертачи баиб бургар ибси пикри бакIибхIели, нушани, хури датаили, къяйк-къуйкла тIамрачил цурми тIашдизурти мераначирад гьайдиахъес  гIягIнитири.
Янила берхIили ургуба ванабарилри. Камли ванабикIухьар, илала гьунар биулри кьялубачибси дяхIи ванзаличи кабикахъес. Ил багьандан вацIализив вашес къияннири. Юлдашлара дилара вацIализи духIнадухъес пикри аги. Хурира ирилизирад датаили, кIина-хIяйна ахъли илди гьирдирути тIамара дураили, баргили вацIализиб гьаргси мер, илала дубла нушара дигIяндикира: белики цура нуша лерихIи бакIес.
Хурани къел дуциб диэс, камси заманала духIнар илдала гъямли чебаргъахъиб алавла тIабигIят. ГIябдуллабекра нура кIидарш метрла цалис ца гьарахъли тIашлири.
ХIерикIулрагу: тяхIбикIули, вацIализибад гьаргси мерличи дурабикили, авцIали-шуцIали метрла набчибад гьарахъли гьинта тIашхIебизесу. Наб лишанасесра гIягIнидеш аги: иткъира тупангла хIяра иличибяхIри бяхIчибизурси.
 «Иргьусив жайраннис, хIергьусив? Бахъ жагаси мицIираглис тупанг игьес-декIар вирару? Нуни кахIебушасли, цархIилтани жягIял-царахIел кабуршу. ГIур чинаб ва мурт къаршибиркуси наб ишгъуна гIяяркьянала трофей?» - хIейрулри нуни бекIлизир дарсдикIути суалтас жаваб бедес. (Ишаб трофей гIяяркьянас бикибси секIал саби).
Гьинта юлдашли чебаибара викIули, ГIябдуллабек левси мерличи хIеризурра. Илини бекI маятникван шайчибад шайчи гьакIбикIахъес каиб. «Аргъира!» - вявъира нуни. ЧIянкIли гьаннара балули ахIенра, чизирил ну вявикIуси: юлдашлизирил яра гьаббухъахъес гьинтазирил. ХIяйна тIяхIбухъи, гьинтани вацIала чIянкI ахъиб.
Илгъунти гIяяркьянабира дила юлдашунира нура!
ГIябдуллахIяжи имцIалин сайцун вири гIяяр вашуси. Савли-жявли дуралхъусири ил хурира сайра Духъяна шурмачи яра бархIехъ шила гIеларти мурбачи. Ил дугели укайэсра ваши. Илала азгъиндеш агартири, хIебири дила юлдашла селигIибалра сегъуналра урехира. Илини суненицун кабурши цунси цура ва лебилра юлдашунас диъла бутIа бири.
Дебали дигахъи ГIябдуллахIяжис адамтала хIурматбирес, юлдашуни сунечи бикес. ГIяярличирад чардулхъухIели сунечи хьурахIебарадри, гьимуркIи илра.
Илала хьунул Сайгибатра учительница сарри. Рахли вамсурси ва вяргIибси хIу, хьурабарес хIейгули,  гIелавилзадлири, «дила биштIатала ва Сайгибатла дяхI чедаэс, дила яшав чебаэс ваши» викIи гIяпабаркь ГIябдуллахIяжи. Вирусирив ил анцIбукьлизив илис дигуси хIебарес? 
Сайгибатла дудешра узбира балли гIяяркьянаби саби. ГIяяркьянала хIянчи  Сайгибатлира далути сари (вацIала бухIнабси Хайдакьла шилизирадсири ил). ЦацахIели яргалис шантала мазаличил дукивси мурул нушачил гIяярличи укьяхъес багьандан, сари дуки аркьи.
 ГIябдуллахIяжини  лерилра нушаличир имцIа цурми кадушибти сари. Илгъуна серхурси ва бамсриагар  адам вирусири дила ил юлдашра. Сен илцадра жявли гIямрулизибад арбякьунтирира дила юлдашуни? Бахъ кьудкьулигу  наб илди агархIели!