Миллионер ветаурси

Баласра, нуни дурутачи хIуша гьамадли дирх¬хIеруда. Вирхаэс-декIар ви¬рару гьарил белчIунсиличи, бакьиᬬси¬личи, хIятта сунени пикрибарибсиличира вир¬харуси адамла гъайличи? Ну тяп илгъуна гьар секIайчи гьа¬мадли вирхаруси адам сайра.
Биалра, арбякьунси дуслизив гIяхIцад замана ну миллионерли калунра или хIушази бурес вирусра. ГIе, миллионерли. Арбякьунси дуслизив.
2018 ибил дусла ахирличив хьулухъунра ну Сагаси Дусла байрамлис Цурала Дуслис хасбарибси (2019 ибил дус БухъутIа Цурала Дус сабри) ца гIяхIси ма¬кьବла белкIес. Макьала бел¬кIес баянти учидирхъухIели, нуни багьурра, Китайский горос¬коп хIясибли, БухъутIа  Цу¬рала Дуслизиб акIубтас (ну акIубси дусра БухъутIа Цурала Дус сабри), гьарбизурли лотерея, дахъал арц дикесра асубируси саби бикIули.
Нуни пикрабарира, гьар жу¬мягIли лотереяла би¬летуни исули, илдачивли давлачеввиэс. Ил заманалис ну хIян¬чиличивад хъули вашуси гьу¬нила мякьлаб лотереяла билетуни дирцуси биштIаси тукенра (киоск) абхьилри. Гьар хъули чарулхъухIели, гьаргдарили улкьайра сабира, ил набзи жибикIусиван билзулри.
БегI гьалар нуни илар дирцути гьарилра журала кIикIел, вецIал  лотереяла билет асира: «Русское лотола», жилищная лотереяла, 6 из 36, золотая подковала, бинго. ИтхIели гьарил билетла багьа даршал къуруш сабри. Цаибил яргалис нуни вецIал билетлис харждарибти азир къурушлизирад урегдарш къуруш чардухъун. Илдачи авдарш гьатIи къуруш чедихьили, гIурра вецIал билет асира. ИлхIели, авал билет цугдикили, наб авдарш къурушри дикибти.
Ну ишкьяйда пикривикIули виэс гIягIнисири:  гьар жу¬мягI¬ли, цали ца буцили, дила лотереялис харждирути шударш къу¬руш сари. Ресторантази ну вашуси ахIенра, савли хIян¬чи¬лара хьурали вашусира, хьун¬рас вавни пешкешдирули ахIенра (дусми илди ахIен)… ХIе¬биалли, жумягIли шударш-азир къу¬рушлис нуни лотереяла  билетуни исес вирус. Ил бирес ди¬ла имканра леб.
Рахли, игъбарбиубли, лотерея цугбикалли…
Ну цугбиркниличи вирхулри: БухъутIа Цурала Дуслизиб акIубтас 2019 ибил дуслизиб (илра БухъутIа Цурала Дус саби) Китайла гороскоп хIясибли, дебали гьарбизес гIягIниси саби. Дирхаирая: камти, диштIати  гьарбизуначи ну хьуликIулира ахIенри. Мукукури дуцили бугъа тIашаэсри дила кьас. Ну хIерлири суперприз яра джекпот сархис или. Гьар алхIят бархIи савли  телевизорличи хIерикIуси ну, Дербентлизирад ляркьухIели Хайдакьла вацIализир хивла галгалиу бамсри ахъес кариибси Малла Насреддинна хабчабличи мешуикеслири. Гьари бурисра хIушазира Насреддинничила ил биштIаси хабар.
ГIе, шиннара бержили, бамс¬ри ахъес тIашбизурлири Нас¬ред¬динра илала хьунулра хивала галгалиу. Насреддин, чедуцили хIулбира, хъянтIалиу някъбира удихьили, къакъличи кайхьири. Илала хьунул, кIелра някълизи буцили галгалиуб баргибси хив, сунези сари гъайрикIулри:
— ДиахIе хъули, убалтехIе иш хив азбарлизибси гIянжи¬ли¬зи, халаси хивла галга лябкьян, иличир дахъал хиви ляркьян, Дербентла базарличир хиви дирцехIе, исехIе кьял, ил бумгар ва биркьу къача… «Чахь-чахь-чахь!» — рехIрихьиб ил пикрумазир кьял изес. Хабчабла шикьатIайчи гIясивиубси, Насрединни «Къачасра ниъ дати!» викIули, хьуна хъянтIализи бяхъиб. Шалати пикрумазирад къябаибси ятим хьунул, уркIрухъи, ребкIиб, бикIар.
АлхIят бархIи савли телевизорла гьала кайибси набчилра илгъуна анцIбукь кабикес асубирарну, дила тухумти, хабарагарли диргаламадулхъадая.
Ахирра «Русское лотола» джекпот хIясибли лугути арцла лугIи шударш миллионничи абикиб, ва илди миллионти наб диркниличи нуни умутбихьира. Бурес хIейрус, сен умутбихьибсирил, амма ну илди арц диркниличи тамай вирхулри. Дила гIямрура далли дарсдиуб: наб ну миллионерван калзулри. Гьар бархIила шикьатIала дархли дебали хужаимси адамлайчи мешудиркулри.
ХIера, ну цахIнав миллионерла рольлизи ухIнавхъунси ца алхIятла бархIехъ, дила уршбира ца тухумра (илдала уми айхъули ахIенра) набчи гIяхIладли хIебакIесу. Бакьили бурги илданира дила миллионер ветаэс къайгъиличила. Дудешла миллионтазибад чус сегъуна бутIа биркурал багьесра дигули бурги. Бухъяна столла гIела кабиили, нешла бизити чуднани букухIели, илдазивад цали хьарбиули сай:
— Рахли лотереяла билет джекпотличи цугбикалли, се дирида, дудеш, хIуни илдицад арц? — викIар ил
- Лотереяличил цугдикибти арц нуни наб хIялалли дикибтази халдирути сари. Наб илди дикес жявлил  гIягIнитири. АвцIали дусичив имцIа учительли узухIели, илди наб хIуку¬матли гес гIягI¬нити, амма хIегибти арц сари. Илдазир лер лерилра гьаларти дусмас наб лугес гIягIниси вецIну хIябра  ибил алапала арцра. Лер илар   курортличиб бамс¬ри ихъахъес матъал лугес гIягIнити, амма авцIали дусла духIнар наб цайналра хIегибти  путевкабала арцра. Илар лер, учительли узухIели кайсули виэс гIягIнити, амма нуни цайналра кахIесибти премиябала арцра,— викIулра ну.
—ГIяхIбаркьла баркьудлумази ахъили, илдазибад гIяхIси бутIа ши-шантас-мага харждирид ургуд?— хьарбиули сай кIиэсил уршили.
— Районнизи башуси гьунчибад нушала юртла гьала баайчи башуси гьуни къирли бурцис, — гьалабал вахъхIи пикриикIули хIядурбарибси жаваб лугулра нуни.
- БубкIуси шилизи башуси гьуни къирли селис бурцулри, дудеш? Гьуни къирли буцес харждирути арцлис хIу шел уриличилси (гIяхIти шуртIрачилси) гостиницализив хIериэс вируд,—викIар ил.
— Или биалра, пикрибарибси бирис. Ну, гIяхIбаркьла баркьудиван, шилизи гьуни бареси ахъесара или, жявлил пикриикIусири. ХIера, гьанна ахъиб ца илгъунара. ХIушанира балули, нушала шилизиб гIур камси селра агара. Мижит нушала леб, хIябри къаркъала лацли алавдарили сари. Школа леб, клуб леб, больница (медпункт) леб. Кьакьурбазир дяргIиб шинна гIинзурби лер. Газ леб, дугели мер-мерличир шила духIнар тIашти тIулрачир хутIла чиргъмира ухули сари. Халкьлис камси хIянчи саби. ХIянчи агрили саби жагьилти шагьуртази арбашахъути ва шими дубкIутили детарахъути.
— ГIе, — викIар дурхIначил варх набчи гIяхIладли вакIибси нушала тухум.— Нуша дучIухIели, школализиб хIябдаршичиб имцIа дурхIя бирутири. Гьанна урегцIали-верхIцIалицун саби лебти, бикIар.
Камси заманали, чузи гьанбушахъесра хI****урли, дурхIнас лугути арцличилара нуни бурира. Гъамли чус биркуси давлаличи илди дебали разибикиб.
— Гьари, ца-вецIал миллион набра,—хабарагарли викIар нушала тухум (хI****ас, марли викIулрил яра масхаралисрил).
— Валлагь, дила узи, сецад гIяйиб барадра, вецIал миллион хIед гес хIейрус. Дила узби-рузбира илдала дурхIнира лебти саби. Леб дила узбикьурти ва рузбикьурти ва илдала дурхIни. Баласра, цацабехIти илданичиб хIуни дила хIурмат имцIали бирни, амма, тухумдеш халбарили, хIедичир илдас гьалар дедес гIягIнити сари дила миллионтазирад арц. ХIу дила кьарига урши сайри. Лайикьси бутIа хIедра сабиур, амма 10 миллион…
— Сен хIелугути? ЛугехIе!— вяврухъун кухнялизирад дила хабчаб. ГIур сарацIиб нуша лерси хъули.
— Эй, ахмах! Се рикIулри хIу? ХIуни балулрив сецад арц сарил вецIал  миллион къуруш, даршал азир къуруш цахIнар някълизи дуцес хIебикибси наб?
— «Лугас» адли се бирули гьатIи хIед? ХIелакIун илди арц агара. Адам разивикахъес, «лугас» а, арц дикибхIели, се-биалра бирехIену.
— ХIейрис! Нуни дила гъайлис къяна бурес хIейрусрану, рахли гьанна лугас или бурасли, джекпот цугбикалли, наб иш гъабзас вецIал миллион къуруш чараагарли дедес чевкъар.
— ХIуни набра къуруш хIелугад!— гъуркрухъун  сунези сари тамай гьимрукIибси хабчаб ва кухнялизи аррякьун.
Нуша, дудеш ва дурхIни, ил суаллара ца ахирличи дакIира ва нушала тухумлис ца миллион къуруш дедес  чеасира. Дила тухум ва ученик бурес хIейэсли разивиуб.
Нуни абзур дус лотереяла билетуни исаси. Гьар илди хIясибдирухIели, ну, камси заманалис биалра, миллионер ветарусири.
Дусла ахирличи гъам¬би¬кIухIели, «миллиард» бел¬кIун¬¬ти билетуни дирцесра бехI¬¬бихьиб. 2020-ибил дусла ян¬варьла цалис дила лерри гIяхIцад илди журала  билетунира! Миллиардер ветаэс наб хIе¬би¬киб, амма ну пикрумазив миллионер виубли калунра…
Лотереяла билетуни нуни гьаннара исулра. БухъутIа цурачи куц хIясибли бахъ мешусигу кьургу вацара, белики Кьургу Вацала Дуслизиб наб гьарбизес.