Геркулес чинав ургуси?

Иш хабар ца жявхIелла грекунала хабарличибад бехIбирхьисра. Уили сай, левли сай итди гьарахъти замунтазив Элида бикIуси улкала Авгий бикIуси пача. Илала дуили сари 30 дус умухIедарибти, хъалчличи даайчи декли дицIибти урчала дурхъби. ЦадехI баянти хIясибли, пачали илар хIердирули уилри хIункьрадли унци, маза ва гIежни, цархIилти баянти хIясибли, — урчи.
 Грекунала Микен ва Тиринф бикIути шагьуртала пача Эврисфейли (иличив Геракл узусири) вархьили сай Геракл (Геркулес) Авгийличи дурхъби умударахъес (Ил сабри Геркулесла 12 гьунарлизибад урег-эсил гьунар). Геркулеслира Авгийлира ишгъуна вягIда барили саби: пачала унцала (урчала) вецIал бутIала ца бутIала багьалис Геркулесли ца бархIили Авгийла лерилра дурхъби умударесли.
  Авгийли балусири Геркулес халаси цIакьла, кьуватчевси АДАМ виъниличила. Сецад цIакьси виалра, ца бархIила ухIнав  илцадра нясти, халати дурхъби умударес хIейрар адамли ибси пикрили ил бусягIят вягIдаличи разиикахъили сай. Амма Геракл, халаси цIакьла вегIцун ахIи, ил дебали гIякьлучевси виъниличила пачали хI****ули увухъун. Гьаланачир Геркулесли дурхъбала луцри урасили сай, гIур Алфей ва Пеней бикIути хIуркIбала шин дурхъби лерси мерличи дяхIчиаили сай. Лерилра иларти дек ва жярга-зекъ варачай ардухили сари. ГIур Геркулесли дурхъбала луцри сагадан тIашдатурли сай...
    Авгий дебали кьиркьир увухъи, Геркулеслис барибси хIянчила багьа гили ахIен. ГIяхIцад дусми ардякьунхIели, Геракл Элидализи дявличил вякьи сай, ва дявилизив Авгий кавшили сай.
    Нушала манзиллис гьалабси цаибил даршдуслизиб (1 век до н.э.) ил анцIбукьличила хабар (миф) Диодор Сицилийскийли белкIунсири. Гьарли-марли илини белкIунси анцIбукь чедиб нуни гьанбушибсиван бетаурси саби, амма итди гьарахъти дусмазибадал Авгийла урчала дурхъби (Авгиевы конюшни) бикIуси гъайла белхъхI****хъуси бутIа цархIил мягIнализиб бузахъуси саби. Дебали нясси мерлис урус мезли Авгиевы конюшни бикIар.
    Гьанна нушала шагьар Элидала пача Авгийла урчала дурхъбийчиб нясли саби. Жярга-зекъ кадирхьути мераначир, нясдешунала дубурти сари. Арбякьунси дусла ахирличирад, шагьарлизир жярга-зекъ ардихули ахIен. Илди мурт ардихутил бурусира агара. Чуйнара Интернетлизира хIеръира, амма агара илабра шагьарлизиб умудеш бирес бехIбирхьниличила белкIунси.
  Нушала игъбар саби ил анцIбукь янила бугIярси замана кабикни. ИшбархIиван дуцIрумла заманара шагьарла кьакьурби гIукъа-къусли дицIалли, коронавирусла чейхъуси иза чеди, гьатIира вайти ва декIти излуми имцIадири. ИлхIели чили уцахъутири нуша илди излумазирад? Чинав ургуси нушани Терекра Сулахъра МяхIячкъалала кьакьурбази дяхIчиаэси адам? Чинав ургуси нушани Геркулес?