Ца пяцанра лев

Арбякьунси даршдусла верхIцIали ибти дусмазиб кабикибсири иш анцIбукь. Дила дудеш ГIяммала Ражабличила ва узи СягIидличила саби нуни буруси. Илди кIелра, Аллагьли бунагь-хатIа урдуцабну чула, жявлил нушачибад арбякьи, итил дунъяличиб саби. Ишдус дудеш вебкIибхIейчибад гъану хIябра дус диркути сари, СягIид вебкIибхIейчирад – вецIал дус.                Дудеш мицIирли левай, СягIид вебкIибси виалри, дудешла уркIи баргбердес асубири: вахъ цIакьли дигахъусиригу дудешлис сунела виштIалгъуна урши.       Бурули бирар, мицIиртани бебкIибти гьанбуршни гIяхIси саби бикIули: илхIели бебкIибтасра саби нушачил, мицIиртачил, барх лебтиван билзули бургар. Чуйнара гьалабра дила белкIаназиб гьанбушибти саби дудешра узира. Иш гьакIлис илди нуни дукелцIидухъесли сипатбирис: белики илдира, аргъили дила масхара, икIаб, чедиб, пишбирхъур.
             Ит заманалис 60 дусичив имцIали виубси нушала дудеш колхозлизив хала букIуй узули левалри. Ну унра шилизив учительли узулри. СягIид Москвала инженерно-строительный институтлизив (МИСИ) учIулри. Нушала ургавси узи МяхIяммад, ил институт таманаили, МяхIячкъалализив юртани тIашдалтуси организациялизив прорабли узулри.
 Дудешлис колхозли, ВатIа ЧебяхIси дявила ветеран сайлин, Западла Украинализибси ца санаторийлизи матъал путевка бедилри. Сунела лерилра гIямру гьаргси закла удир деркIибси нушала дудеш хьулухъун виэс бамсриахъес курортличи укьес. МяхIяммадли ил «Дагъистан» поездличив Москвализи СягIидличи вархьибсири. СягIидли Москвализивадли Западла Украинализибси Моршин бикIуси шагьарлизи аркусири.
            Поездличи кабиили илди Харьковлизи баили саби. Илаб цархIил поездличи кабиэс гIягIнитири. Харьковла вокзаллизив СягIидли дудеш «Для участников ВОВ» или сунела чеди белкIунси билетунала кассала улкьайличи гъамиахъуб ва яргала къяйлизи катур. Дудешлис гьалаб хIябал-авал хьунул адам лебри ярга сабаайчи тIашли. Чула гIямрула дусми хIясибли, илдира дявтала бутIакьянчиби биэс гIягIнитири.
 СягIид кассабала улкьайтачи къаршиси бацIси скамейкаличи кайиб. Дудеш вахъхIи-декIар кахIели урги яргала къяйлизив тIашли, ва нуни гьанбуршуси анцIбукьра кахIебикес асубири бургар, рахли илав, дягIли савхибсиван, хабарагарли ца зурба жагьил адам дакIухIевхъи виалри. Чизилра селра хIеили, яргала къяйлизиб тIашти хьунул адамтира нушала дудешра мучлахIебарили, ил вархьли улкьайличи гъамиуб. Серил бурули, гIяхIцадхIи калун. ГIямру деркIибси кассирша (илра дявила бутIакьянчи рурги) иличил ахъли гъайрикIесрииб. Багьеслири илини улкьайла гьалавсила мурад хIебирули риъни…
Сунес гьалаб тIашти хьунул адамтала разиагардешла гъайла аргъили, хIеризур дубурлан билетунала кассала улкьай буцибси жагьилличи. Сунечи къакъбарили тIашси иличидяхI ца-чумал ганз кацIиб. ГIяйсала хьар някълизи буцили, гIяйсала хъар яргала къяй булъусила хъяблизи бархахъили сунечи зузбарили, ахъли викIар: «Чинав дявтазив калунри, хIу…!? Москвала удиврив?! Сталинградла удиврив?! Белики Ржевлиув урги?!» Урузиубси жагьси адам, гIяшбуцили бекIра сайра, къалабали вокзаллизивад дуравхъун…
Вях! — или лебталалра дукелцIила тIама дурахIедикесу. «Молодец дубурлан!» — бикIутира ахъиб. СягIидли бурни хIясибли, нушала дудеш урузвиуб ва шайчивяхI гьайвиуб.
ИлхIели кассала улкьайларад тIама адердиб: «Эй, дубурлан! ХIу, хIу, мазала кьапIала вегI! Гьари, иша гъамии». Дудеш улкьайла гьала саибхIели, «ХIечил цархIил чи лева?» — рикIар кассирша, иличи ванали хIерризурли. «Ца пяцанра лев», — викIар дудеш. «Гьари, чеваахъа, чинавал ил пяцан», – рикIар улкьайлабад бекI дурабатес къайгъназирси кассирша. Дудешли СягIид кайибси скамейкаличи тIул бяхIчиаиб.
ЧIакани дуклумиван скамейкала къакъличи гIяйдарили някъбира сайра, бара пиширхъули, лебилра скамейка буцили, кайилри жагьил Геркулес (Ца жумягI гьалав азадли мушулбашнила шайчирти Москвала чемпионатла абзаначив 97 килограммла битIакIлизив ил призер ветаурсири).
 — Чинава ишав пяцан? ХIя-хIя-хIя! Пяцан! Пяцан! – дукарряхIиб кассирша. КIидехIэсти лебталалра дукелцIила тIамрани вокзалла зал баргаэс асубири. Илди дукелцIи лебтасалра нушала дудеш гIяхIвизнила лишан сабри.