БалхIебикибси масхара

Иш биштIаси анцIбукь набчил кабикибси саби, ну унра шилизив учительли узухIели. Гьачам дуцIрумла замана нуни кьасбарибсири чина-биалра курортличи укьес. Чина укьес гIяхIсира или хьарикIуси набзи чилирил дебали гапбарибсири «Каспий» санаторий, «урхьула дублаб жагаси умуси пляж, мякьлар держес дяргIибти шин ва дахъал цархIилти лазатуни лер» викIули.
Путевкала багьала шел бутIала ца бутIа профсоюзли лугусири. ГIеларти арц нуни кайхьили, асира путевка ва…
Наб ишаб бурес дигулра: матъал лугуси путевка хIясибли ну гьачамалра курортличи вякьунси ахIенра. Цайналра!  Советский Союзла замана дахъал дуили сари матъал лугути путевкабира. Лер илди гьаннара.
МяхIячкъалала Редукторный поселоклизив хIерирули ва набчил варх урхьула дублав къунзикIули вири набтла мягIдунтазив узули калунси ца хIянчизар (нефтяник). Ил пенсияличивхIелира гьар дус матъал курортуначи вашусири. «Ягъари, хIед-декIар сен илцад сахаватбиубси нушала хIукумат?» - хьарбаибсири гьачам нуни илизи. «Ну нефтяник сайра!» - уктемли чарбатурсири илини наб жаваб. ГIур багьурра нуни, илини белчIунсира Избербаш шагьарлизибси профтехучилище биъни. «ВяхI! Писки МяхI викIуливан, «цадехIтас газетуни, итдилтас лазатуни» дуилигу нушала хIукуматлизир», - урхьула дублар, гIямрулизир бегI гьалар дурадикибтири итхIели дила хIукуматличи разиагардеш иргъахъути чедирти дугьби.
Профтехучилищецун белчIунси илис, вебкIайчи матъал путевкаби лугули, курортуначи вашахъухIели, авцIали дусличив имцIали узуси университетла багьудила вегI Дагъистан Республикала урибси  мугIяллимлисра, гьачам биалра, илгъуна путевка гес бири.
Чи сайри нушачи лехIирхъуси я  итхIели, я гьанна, «Хури гъямдикIар – карбан башар» биалли нушала хIякимтала бетуц-кабиз? Датурли илди пайдаагарти гъай, нуни буруси даимбирисра.
ИтхIели, путевкала багьа 80 процентла дила кисализибад гили, вякьунсири ну 21 бархIилис «Каспий» санаторийлизи. Лерил гIягIнити секIал лерри итар. Биалра, гьаларти бурхIназиб анцIбукьи бииши, наб циила декIлири. ГIур лерилра далкадикиб.
Гьачам, шилизибад чарбухъи, саби хIербируси Сухокумсклизи аркьути узбикьуртанира набчи гIяхIладли хьурабарибсири. ИлхIели Сухокумсклизив ГАИ-ла инспекторли узуси дила узикьар ГIябдуллабекли чула шагьарлизив узуси ва ил замана матъал бикибси путевкаличил санаторийлизи вакIибси ца ГIяхIмад бикIуси адамличил ну тянишварибсири. Ил бархIиличивад вехIихьили, ГIяхIмад, хяличил сунела къуйрукъван,  мурталра набчил варх вирусири. ХIязлис хIебурги илис юлдашуни сайгак бикIутира: саби балхуси адамлис гIергъи мукьараван башуси саби, бикIар, неш агарли абикьурси сайгакла дурхIяра. Амма итхIели ну, Сайгак-адам хIегьурли калунси виасри, гIяхIсири!
ГIе, гIе, итхIели «Каспийлизив» ну иличил тянишхIейубси виасри, илаб дила, бикIуливан, гьарли-марси курортный роман бетарусири.
Леначил ну тянишиубра, массаж дирусиличи вашес дилара у белкIахъес яргаличи кайзурхIели. ИлхIели нуни наб гIергъи каризурси ца рухъна  массажистличи гьалар рархьира. Иличибли гIергъи каризурсили жагаси ва жагьси урус хьунул адам уррухъун. Нуша ихтилатдикIира. ГIергъиси бархIи ну, чебаахъибси замана хIебаили лебай, массаж дирусиличи вакIира. Нуйчирра кьанни ракIес гIягIниси Лена жаняхIлизибси диванничи кариили чераибхIели, дила уркIи къизбухъун: ил «курортный роман» бехIбирхьнила лишанри.
«Адамли бетхIеурсира гьала хили бетаурсиван пикрибиру -  Аллагьли сунес дигуси тяхIярли биру» бикIуливан, итхIели дила курортный романра бетхIеур. Сен? СенкIун ил  бехIхIебихьили лебай Сайгакли буун.
ХIябэсил бархIи ну массажистличи гьатIира жявли вакIира. Ил яргалисра Лена наб гьаларикили ракIили раргира. УркIи разидешли бицIибси ну, саламра бедили, илала мякьла диванничи кайира. ТIягIямла ихтилат бара бемжурси замана нушала гьала ГIизраил-малаикван Сайгак тIашхIейзесу. ГIур ита-иша къунзухъун, гIурра нушала гьала чариуб, тIулбани бекI хъарсбариб ва, набчи дугьаизурли, викIар: «ХIу нуни валусири. Чинав чеибсирил, гьанна бурис». «ГIячихъли, валусира, – пикриикIулра ну. – ХIегьес вируду, даг бархIехъра хIуни дила гIярякьила шиша бержибси виадли?» Илди гъай нуни сунези хIедурили левай, Сайгак гIурра набчи гъамиуб, ахъбуциб някъ, хъарсбариб лихIила чедила ва викIар: «ГIе, гIе! Гьанна гьанбикиб, хIу чинав чеибсирил. ХIу Хасавюртла базарличив сулкъа къяжнани (пирожки) вирцули чеибсири». Дебали гIясивиубси, ну диванничивад харчизурра ва, буреси хI****ули, аъвяхъили калунра (Ишаб бурес гIягIнибиркур дила гIямрулизив ну цайна виъни Хасавюртлизи вякьунсира, илра автостанциялизи). Сайгак гьавухъун. Массажистличи ахIерацIили, аррякьун Ленара. КIел бархIи набчи гъамхIейрули калун Сайгак-ГIяхIмадра. Ахирра гъамиуб, «Чевверхи, валлагь, ит дила масхарари» викIули. ГIур нуни Лена чехIераира.
БехIхIебихьили лебай, таманбиуб дила «курортный романра».