Ца биргълаличи кIина кьяш кайцIути

- Ягъари, Мурад, гьар мурталра ца хатIа бирули, бахъ дила набчи гьимидухъигу, кумек барес хIейишира? – дугьаизур ца бархIи урхьула дублав набчил вархли учительли узуси дила районнизивадси  вахъхIила юлдаш. Илра, тяп нуван, хIила тумла изай дубуртачивад диркьаличи дугIеибси сай (Иш белкIлизив ну илис МяхIяммад викIусра).
- Гьари бура, се сабил хIечил бетаурси, белики вииша хIед кумекбарес, - викIулра юлдашлизи ва хIядуриубра илала дакIу-гьаргли бурусиличи (исповедь) лехIизес.
- ДигIянхIебарили хIези бурисра: дила бахъхIи лебси саби простатит бикIуси няс изала. Ил гIяхIбарес нуни хIебарибсира хIебургар. Чуйнара дугьайзурсира тухтуртачира, кьяртIаира дахъал дармунти.  Ессентукилизирти ил изайчи хасти санаторийтазира вашули вираси. Камси гIяхIдеш бетаур бургар или гьанарули саби, амма... Гьалаб  кункси гIягIнидеш хIясибли дугила ухIнав цайна-кIина алзули, гIямал бетарусири, гьанна биалли шуйна алзулра.
   Интернетлизив кьяйцIикIули, баргира, белкI хIясибли, ил изала гIяхIбируси цагьатIи дарман. ДелчIунра ил дармай гIяхIбарибти мурул адамтала белкIани. ДакIахъира гIяхIси багьалис таблеткаби («гIяхIси» ибси дев «халаси» ибсиван иргъуси саби)… Дармунти назмулизивси («ЭмхIеличив ца хIяна, дицес или тIалхIяна, шел шилизи ваалра, хIейрули дицес цалра») булхъранна вацни дубкIахъути дармунтачи мешутили урдухъун.- Цаибилгъуна, бурасли, изала дигIянбарес вируси ахIен. Дургар дахъал цархIилти чучила бурес цIахбилзути излумира, амма простатит, дила пикрили, илдала къяянази кабурхуси ахIен. КIиибилгъунара, тухтуртани дурути баянти хIясибли, лебилра мурул адамтазибад 35-50% ил изайчил зягIипти саби. Ил багьандан, ахIерси МяхIяммад, шишимтази маркуд. Варга гIяхIси тухтур, гIяхIдара хIела изути, - викIулра ну ва, хапбарили шинничилси пластикала бадира, итил някълизи буцили удочка, бялихъуна урцес мурталра калзуси мерличи гьайбарра (цархIилтиван, хIязлис урхьула дубла вашуси ахIенра).
   - ТIаш! Гьари тIаш! – вявикIули, набчи гIергъивикиб МяхIяммад. – Ну простатитличила буресцун ахIенри хIечи дугьавизурси. Алхаб саби ил няс изала! Дугелис кьадин хIерили усусра. Дила хIези буруси цархIил секIайчила саби. ХIуни чебиулрив иш дила куц? ХIелара лебгу гIяхIцад хамха, 100 килограммла хIелара битIакI бургар. НукIун хIуйчивад 30 килограммла декIлира. ХIеризи гьари иш каниличи. Ну савли урхьула дубла вашуси, хIуван бялихъуна урцес ахIенрану,  кани беткахъахъес сайра.
   - ГIур нуни се бариша? – викIулра ну, тIашилзули. – Нуни кани бетахъахъес  вирасри, иш дила, ХIямзат ГIямарович викIуливан, урха тIуницад (шинкьаниб урхабтала чедибси анкIи калкьуси халаси урца тIакьа) кани хI****таси.
   - Наб ХIямзат ГIямаровичли дурути гIягIнили ахIен (ХIямзат ГIямарович МяхIяммадлира валуси вахъхIила учитель сай). Дила хIези цагьатIи буруси лебну, камси багьлабара. ХIед нуни, дила хатIаличибли ишбархIи хIедиркути тарашкаби, тукейзирад асили, лерхисну, камси заманалис тIашизи, - наб гIевваэс къайгъназив, вявикIулри МяхIяммад.
   ТIашизурра ва юлдаш гIевваахъира. Мурхьли гьигьикIули, ил мякьлабси шурличи кайиб ва вехIихьиб:
- ХIуни балусив «наступать на те же грабли» («ца биргълаличи кIинайсра кьяш кайцIес») бикIуси урусла белхъхI****хъуси дугьбала цахIнабикла (фразеологизм) мягIна?
- Балуси саби. Фразеологизмаби хIедагьес нукIун санигIят хIясибли урус мезла учитель сайра. «ВегIла хатIаби тикрардирес» ибси саби. Биргълаличи кьяш кацIалли, биргълала тIелила хъар вегIла цулбази чейгуси саби. ЧIянкIли абдал тIакьаницун саби, сунес бетаруси балукъира, кIинайсра биргълаличи кьяш кайцIуси.
- ХIебиалли, дила ахIерси юлдаш Мурад ГIяммаевич, ну «абдал тIакьа» сайра. ШуцIали дус набчил дархли гIямру деркIибси хьунулра или рикIули сари. Нугъунази бургар далайлизиб бикIутира: «Ва дила абдал тIакьа, хIези дурути дакьа». ИшбархIи нуни, далуйти далайчибас датурли, сен наб ну или викIусирал, хIези бурисра.
   Ца баз гьалав Интернетлизив кьяйцIухъунра ну халаси кани ва лебилра хамхала цIерхьдеш, сегъуналра диета хIебарили, беткайхъахъуси дармайгIив. Баргира ил. «Арц агарли бурхьуси саби» или белкIири, рахли къалабаикили, ит бархIил заказ барес валкьаасли. Дармунти дурхьутала тIалаб хIясибли, бусагIят белкIунра дила телефонна номерра. Ну пикриухъесалра хIетурли, телефонничирад зянкъ хIядяхъесу. Дебали гIяхIли гъайикIес балуси мурул адамли таблеткабала гIяхIдешличила буриб ва дила паспортлизирад баянти сасиб. «5990 къурушлис ца жумягIла бухIнар хIечи дармунти диахъехIе», - викIар. «Арц агарли дурхьути ахIенрив?» - хьарикIулра ну. «Урегал упаковкализирад авал арц агарли дурхьути сари, кIел -  багьалис», - викIар ил. Рагьарриуб унзанир дила рухъна хабчабра, «Мадурхьахъид! ХIу гьалавра виргIявиргирину, вари мадурхьахъид!» рикIули, някъбани гьакрикIули. Телефоннизи «мадурхьида» викIес наб цIахбизурну, нуни дархьахъес бурра. Абхьили  ноутбук, цархIилти ил дармайчила се бикIулил багьес пикриличил иличила делкIунтачи хIеризурра. «Илгъуна дарман лебси ахIен», - бикIулри цабехIти. «ХIязла арц харждирулра», - бикIулри итилти. «ГIяхIдеш биэсра асубирар» бикIутира лебри. Пашманиубси нуни зянгъдяхъира наб дарман дурхьутала телефонна номерличи. «ХIела адрес хIясибли дармунти дархьилра» бикIуси жаваб сабри лугуси. Чуйна зянгъ дяхъядлира, ил ца жаваб сабри чарбируси. Урегал азир къурушлис виргIявиргниличи ну таманни шакикира. «Ца биргълаличи кIина кьяш кацIилри хIуни, абдал тIакьа», - рикIар хабчаб. Иш гьакIлис ил рархьсили уррухъун.
   Ну кIел бархIи пикривикIаси, посылка чарбарес гIямал баргес или. ХIябэсил бархIи телефоннизирад зянгъ адердиб. Гьаланачиб хьардаиб дила у, фамилия, отчество. ГIур бехIбихьиб хIерируси мерла адрес хьарбиули. Селис зянгъбикIутирил нуни багьурра…
- Ну, коронавируслизи викили, даг больницализи арукибсира.
- Коронавируслизи викIуду?, - рикIар урухриубси хьунул адам.
- ГIе, коронавируслизи. Дила хургьартала 52% заясили баргиб. Дила пикрили, хIушани лугути дармунти наб гIягIнихIедиркур, - вируцад язихъли дураира нуни илди дугьби.
   Телефон бишун. СецадхIейс? «Белики, больницализивад чарухъунси хIу илдани багьлали ватиши», - бикIули саби балуй хъарчIайчибси шайтIан. «МажахIят, валтари, - бикIули саби алгъай хъарчIайчибси. – ХIуни илдас урегал азир къуруш иткъи лугулри». ГIягIнилирив наб кIинайсра ца биргълаличи кьяш кацIес илцадра къалабаикес? Ну больницализив хIейъни багьалли, арц сеналра набзирад авду дургар.
   ДукелцIидухъун дила юлдашли дурибтачи. Гьандикиб цацахIели  нунира кIина биргълаличи кьяш кацIибти анцIбукьуни (нуни тикрадарибти хатIаби). Хъумкартурра бялихъуни. Юлдашла мякьла кабихьира биштIаси туристунани барх бихуси ута, лайдакIили бадираларти шин, кайира уталичи ва викIулра:
   - Гьари, дила юлдаш, тяп хIечилгъунти, набчил кадикибти анцIбукьуначилара бурис. ЖагьхIели, нуни почтализирад художественная литературала жузи дашахъули вираси. Илди дурхьутани хIялалси хIянчи бирули бири ва наб гIягIнити жузи дурхьи.  ГIур нуни почтализирад гIягIнити палтарра хъа ваяхIра дашахъули вираси. ЦацахIели биалли (гIеларти дусмазир) хIед гIягIниси секIал  бархьили камси замана бикила, тIашбизагарли дашахъутири, «хIела номер цугбикили сабину, хIед миллион къуруш дикес асубирарну, се биалра гIурра заказбара» дикIути кагъурти. Мургьи рангла умхьура (золотой ключ) бири кагъарла бухIнаб. Цайнацуну гьатIи? Илди кагъурти ну шагьарлизи гечиубхIелира шилизи дашули дуилри. Замана бакIиб наб илдала макруличи шакикес. Амма шакхIейкира. Июнь базличиб цайнагьатIи кацIира нуни кьяш ит баягъи биргълаличи.
  - Чебиулрив иш сягIят? – викIулра юлдашлизи, някъличибси Чедибдешла орден циферблатлизи кабяхъибси сягIят чебиахъули. – Жагаси сягIят саби. АхIену гьатIи? Телевизорлизиб буруси ишала багьа 1990 къуруш саби. Нуни ишис заказ лугухIели, набзи бурибсири, сягIятличил барх картара ца савгъатра (ценный подарок) бирар или. Почтализи бакIибси бандерольлизиб лебри ца букIуси жуз (брошюрка). Илизир чедаахъилри нуни гIур яргалис чучирад дакIахъес вирути секIлуми. Брошюркала багьа 900 къурушличи абаахъилри. Чуни бурхьуси савгъат илаб аги. Посылкалис набзирад хIябал азирлим урегдарш къуруш сасибтири. Баз гIергъи набчи зянгъбикIухIели буриб савгъат наволочка биъни. Нуни чучибад пушбируси буруш (надувной матрас)  бакIахъасли, наб ил наволочкара барх лугусири.  Дебали гIясивиубси нуни, илдачи вявухъи, «хIушала бурушуни ва наволочкаби наб гIягIнили ахIен» или бурес чебуркъуб.
Забли ургьуси бархIи бялихъуни дуцес вакIибхIели, хабарагарси урхьула рамчла шин чегили тIашбизурли, сягIят нуни устачи бухес чебуркъуб. Илини буриб сягIятла духIна шин дякьи сари викIули. ШинкIадеш душкиб, барсбариб батарейка, сасиб хIябдарш къуруш. Устани бурили багьурра нуни дила илцадра жагаси сягIят «Китайла ширпотреб» биъни. Багьес гIягIнисири нушала хала хIякимтани дурхъаси «Чедибдешла орден» кабяхъибси сягIят, Китайлизиб хIебарахъили,  Швейцариялизиб барахъес гIягIниси биъни.
Нуни барибсира «ца биргълаличи кIина кьяш кацIни» ахIену?. Нура хIугъуна «абдал такьа» уилрагу.
   Гьаргбарили бялихъчила сумка, дурайсулра гъалагси чедилаличилси кIидаршлим шуцIали граммла Къизлярла коньякла шиша ва кIел тарашка. «Дерхъаб, дила узи МяхIяммад! Нуша коронавируслизи хIедикесли, нушазирти излуми агардиэсли ва гIур нушани кIина ца биргълаличи кьяшми кахIецIесли».