Житали чеббицIни

Дила виштIасигъуна уршилисра илала хьунуйсра хIянчилизибад акьуси замана гьарахъти мераначи шадиб башес дигахъу. ЦацахIели илдани чучил барх дурхIнира арбику, имцIаливан сабицун башар. Наб кьалли, илдала архIяби гIяхIдилзули ахIен, биштIатачил дурадуркIутикIун – бекIлил. Амма илдази наб хIейгибилзни балахъули хIейрус. ХIера, ишдусра илди дурала мер-мусаличи букьес хьулбухъун. ДурхIни Къизларлизирси хала нешличи арбукили, илдани Дубайлизиррил Домбайлизиррил байрамла хIябал бархIи деркIес пикрибариб.
ИлхIели нуни уршилизи тиладибарира, мурталра сабицун кавлуси чула жита, набчи кахъес. ЗягIипси хабчаб дурхIначи гечриъниличивли, итди бурхIназив нура нуцун сайри хъулив кавлуси. «Духуси жита заманалис биалра цунси наб юлдашли бетарар», - пикриухъунра ургус ну. 
Ириъ нушала газетализи дила «Улкьайла кьасиличиб житала дурхIя» бикIуси хабар кабяхъибсири. Баягъи илабси житачила саби дила сагаси хабарра.
ХIера, октябрьла 3-личиб, хамис бархIи бархIехъ, Краб набчи киб. Уршили бурни хIясибли, жита хIябал дуги-хIери набчиб кавлусири. Краб бархIилис диштIати пакетуназирти, хасти хурегуначил балхес гIягIнисири. КIел пакет савли гьаргдирутири, кIел – бархIехъ. Илис цархIил секIал бедлугуси ахIенри.
Нуни жита хIябал бархIи урши викIуси тяхIярли балхаси. Гьачам нуни илис камси бирцIибси бялихъра белхьунси хIяйва диъра дедира. Илини илдира тIягIямличил деркун. Амма цархIилти нуни дукути секIулти, сунтIдарили, хIедерки далтулри. Рахли савли жита набчи гъамбиалри, нуни илис кофеличилси кружка гьабурцаси. СунтIбики, илини илди дархьдалти…
ГIяхIцадхIи ил набчи гъамхIебирули калун. Цаибил дугикIун набзи саби хIяршбарахъесалра хIебуиб. Нуни Интернетлизиб белчIунсири, житала хъяб хIяршбиралли, илис сунела дурхIядешла гIямру ва неш гьандиркути сари или. Ил багьандан саби, бикIулри Интернетлизиб, житас хъяб хIяршбирни дебали дигахъуси.
КIиибил дуги ил набзи сунела хъяб хIяршбарахъес буиб. Гьандикиб дургар житас биштIахIелла гIямру ва сунела хъяб лямбируси неш. Амма сецад ну жиикIули хьалли, ит дуги Краб набчил барх бусес хIебакIиб.
ХIябэсил дуги дай дуги гьанкIлизивад чеваргъибси нуни чебиулра дила мякьла бурушличи кабихьунси жита. Нуни багьлали иличибяхI някъ гьабатурра…
Крабли сунела гьаларти  кIелра кьяш дила някъличи кахIедихьесу. БиштIаси, назикси букес хI****уси житала дурхIя кIел дус гьалаб нушачи кибхIели, сунела бекIличивад хъябличивяхI хIяршикIуси ну гьаникира ургус илис. Бархьли бурасли, гьанкIлизиб житала кьяшмаубад дила някъ урасес урухкIули, наб гьанкIра хIебакIиб. Савли нуни мякьлаб жита хIебаргира.  ХIябэсил бархIи кьанни архIяличивад чариубси урши жита арбукес хIекIиб. Ил багьандан Краб авэсил бархIира набчил калун. Авэсил бархIи савли жита бахес дила хъулиб хурег аги: уршили хIябал бархIилис сарри хурегла пакетикуни датурти. УвяхIяхъили юртла цаибил дерхIличи, илабси тукейзирад нуни авал житала хурегла пакет асира. Илдазирад кIел гьаргдарили, Краб бахунра.
БархIехъ цIябхIедиубли лерай, Краб гъузгъалдибиуб: мявбикIули, ита-иша баши, ну сунела хурег кабирхьуси тIалхIяна лебихIи живираси. Ил гушбиъниличи ну шакикира: нуни асибти пайдаагарти хурегла пакетикуни диэс гIягIнилири. Амма нуни кьасбарира жита, хIябалра гьаларти бархIилизибван, дугели кьанни бахес.
Се бирули гьатIи Крабли? АбацIили столличи, телевизорличи хIерикIуси ну мучлахIерили, дила гьалаб тIашси кофели бицIибси кружка кабикахъиб. ГIур биалли, уктемли башули, столличибадли тIяхIбухъи, улкьайла кьасиличи кабииб. Бархьси саби, житани дила кофела кружка балу-балули кабикахъиб викIес ну гIячихъли хIейрус. Белики ил сунесра хабарагарли бетаурси хIянчи бурги? Амма…