Хала дудеш Хемингуэй

Дагъистанна халкьла писатель ГIяхIмадхан Абу-Бакарла лебси саби ца биштIаси «Хемингуэй» бикIуси хабар. «Америкала писатель Эрнест Хемингуэйла машгьурдешличила нушачира итхIели хабар баилри, - викIули сай ГI.Абу-Бакар сунела хабарлизив. - Иличибли дубурла шимазир илала жузицун ахIенну, дубурлантала хъа бяхIяначир черяхIкахъибти писательла суратуни дархли чедаэс вири. Хемингуэй сунела хIяна   муцIурличил ва цархIилти лишантачил дубурла адамтачи мешусира сайри».
Ишаб къантIли гьанбуршисра ил хабарла мягIна. Хабарла игит ГIусбанни, сунела юлдаш Мурадличи гIяхIладли вакIибхIели, илала хъа бяхIличи чебяхIкахъибси хIяна муцIурла вегI мурул адамла сурат чебаили сай. «Чи сая икI? – хьарикIули сай ил Мурадлизи. Мурадли масхаралис юлдашлис ишгъуна жаваб чарбирули сай: «ИкIкIун дила хала дудеш Шихша сай. Марлира ил хIед гьанхIеркулив?». «ГьанхIейкес вирусив икI наб? ГIяжаибли виркур, сунела гIяпабаркь. ГIяхIгъабза адам вири икI», -- чарбалтули сай гIяхIялли жаваб.
ГIур Шихшала арадешлис чумал стакан хайдакьла «Мусти» бикIути чягъирла держили, викIули сай: «Гьар наб Шихса къаршиикибхIели, ну илизи хIу дебали Хемингуэйличи мешуси леври викIусири».
Чедибси ГI.Абу-Бакарла хабарла бухIнабуц сабри. Тяп иличи мешуси анцIбукь набчилра кабикибсири.
Арбякьунси даршдусла 70 ибти дусмазив Москвализив институтлизив учIуси дила виштIал узи МяхIяммадли наб Хемингуэйла рамкализи буцибси шишала тахтали  кIапIбарибси халаси сурат хибсири. Илини наб Хемингуэйла жузи дигни балусири. Писательла суратличи ну дебали разивиубра, ва нуни ил нуша хIердируси хъа бяхIличи баршира.
ИтхIели дила бегIти колхозла фермализиб бузулри ва диркьаличибси нушала хъарахълизиб хIербирулри. Ну биалли, унра шилизив учительли узусири ва гьар бархIи бархIехъ хъули чарулхъусири. ХIера, ца гIела гIебшнила алхIят бархIи, савли, се хабурти лерал шилизир багьес кьасли, ну гумайлизи ватихьира. Дураб бугIярлири, ва гумайлаб кIел адамцун сабри лебти. Илдазивад халасигъуна дила хала нешла узикьар сайри. 60-70 дусла адам сайри ил. Илисра, ГIяхIмадхан Абу-Бакарла хабарлизивси игитлисван, ГIусбан бикIусири. ГIусбанничив циила виштIаси МяхIяммадра дила гъамси тухумри: ил дила дудешла узикьар сайри.
Чучи гъамируси ну чеваибхIели, дила тухумти дебали разибиуб. Илдани набзи бегIти диркьаличибад хъули чарбиубал хьархъардяхъиб. ГIур биалли, камси замана тIашизурли, ГIусбан викIар: «Мамедкъалализирад Кьалумшатра хIушачи ракIиб бикIули аргъирагу. РакIибу илра?» Ил суалличибли багьурра нуни, сен илцадра жявли дила тухумти гумайлизиб багьарибиубтил.
Мамедкъалала мякьлабси тIутIи дашахъуси ГIялиевла уличилси совхозлизир нушала гIяхIял хьунул хIеррирусири. УркIмуццан сарри ил, ва илис Кьалумшат бикIи. Илини гьар дус дицахъес нушачи чягъир дихутири. Чягъирла литрла багьа ца къуруш сабри, ва нушала шилизир илди гьамадли дицес вирутири.
Нуни илди кIелра набчи арбукира. Нушала азбарлаб, тяхIуси мерличиб, хIябдарш литр сунези кадурцуси мигла урца чарма дила тухумтачи хIерли баргира. Гьанналис чарма абхьили ахIенри. ЧебяхIси ВатIа дергъла бутIакьянчи, хабарлизиб нуни гьанбуршуси замана колхозлизив шоферли узуси дила дудешла узикьарли чармала чедибси чекабикIан устадешличил чармалабад дурасиб, резинна насос кабатурли чягъир дакIахъили, авал литрла чайник бицIиб.
Камси заманали дила хьунуй бухъмуйличил берцIибси хайнигара хIябал халати стаканра нушала гьала столличи кайхьиб. Нушани цаибти стаканти, кьара-кьурейшлан Кьалумшатлис арадеш булгули, ахъдуцира…
Чайникларти чягъир кадерхурли, дацIти стаканти столличир тIашлири. ИлхIели, сен хIеризурал хI****ас, ГIусбанни бяхIличи баршибси хIяна муцIурла вегI адамла сурат чебаиб.
- Чи сая икI нуша дубурлантачи мешуси адам? – викIар ГIусбан.
- ИкIкIун дила хала дудеш Чижахъа ГIямма сай, хIела рузикьар ва дила хала неш ГIяммала КIигьилила мурул. Сен хIуни икI хIелусив? – викIулра ну масхаралис.
- Агь, сунела бунагь-хатIа урдуц. Даг чеваибсиван гьаниркур. Адамла икIцадра мешуси сурат касес  вирусив?! Гьари, Чижахъа ГIямма гьанушилира цаца дужахIе, - викIар ил ва бацIси стаканничи някъ гьабатур.
- ГIе, гIе, бержес чебиркур, - пишяхъиб дудешла узикьар ХIяса МяхIяммад.
Хапбарили чайник, ну цаибил дерхIличибси чягъирла чармаличи  ватихьира.