Агь, улелъа, улелъа!

Наб дубурла бяхIяназир дугIли дашути улелъаличила ахIен дила макьалализиб бурес дигуси. Наб бурес дигуси халати улелъаличила ва илдала ахъбикIуси багьаличила саби. ЦархIилти нушачир дирцути секIайчилара бурес дигулра.
ХIера, базличир имцIали диркули сари, шагьарла кьакьурбазирти вачар-чакар бирути мераначир улелъа дирцухIейчирад. Гьаланачир илди пластикала диштIати, хурег кабирхьути тIакьназир дирцутири. Илдазирти улелъара дебали халати, сегъуналра тIем агарти дирутири. Рахли беркес хьулухъи, багьа хьарбаадри, ца килограммалра агарти улелъала тIакьалис бегIлара камли буруси багьа 300 къуруш сабри. ИлхIели илди деркес иштяхIра хапли беткайхъусири.
- Гьуя! 300 къуруш дирару, ишар 30 улелъалра агарагу?- дурабикиб гьачам дила мякьла тIашризурси гьести гIямрула хьунул адамла.
- Украиналичил дявти сари. Долларла багьа 100 къурушличи абаили саби! – вяврухъун иличи улелъа дирцуси хьунул адам.
- Ахъбиубси тяхIярли кабиркуси саби долларла багьа, дила рузи, - викIулра ну. – ХIуни кьалли сунезир улелъа дашахъуси парник барибти гIягIниахълуми доллартас асибти ахIен.
- Ну улелъа дашахъан ахIенрану, илди дирцан сарра. ХIуни улелъа хIейсули виадли, цархIилтани исути сарину, вашен ишавад, – рикIар набзи ил хьунул адам.
Наб калунси илавад ватихьесцун сабри. «ВецIну шура-гъал бархIили ишдала багьа кабиркуси сабину, тIашилзас», -- викIули хъуливяхI гьайбарира.
ВецIну шура-гъал бархIира дикиб, дакIудухъун кьакьурбазир гIурра дахъал вачар-чакарла хIянчи дузахъути мерани. Базриганти бадира – бадирали улелъа дирцес бехIбихьиб. Чинаб-биалра гьунила дублаб, адамти бет-садбашути мераначиб дакIубухъун, чула вегIдешла машинабачир нушала шагьарлизи хили, улелъа дирцути адамтира. «Илдани цIедеш чула вегIдешла хъучир дакIахъибти диъни багьандан, циила дургIели диэс гIягIнити сари», - пикриухъунра
Ну хIянчилавад хъули 15-17 минут хьурали вашусира. Авал мерличиб наб улелъа дирцути къаршибикиб. Лебтанилра буруси ца багьа сабри: бадира бицIибти улелъалис 1300 къуруш дедес гIягIнитири. Ириъ Дербентла районна Сабнова шилизирад хибти улелъа нуни нушала кьакьалар 800 къурушлис бадира хIясибли асибтири. «Ишдусра илди лерхуну, гIурра тIашилзас», - пикрибарира нуни.
- Азир къурушлис улелъала бадира лугулину, ваши илди асес аркьехIе, - рикIар гьачам хабчаб, ну бархIехъ хъули чарухъунхIели.  «МажахIят, илди гIур дургIедиэс», - чебатур илини, лехIкахъибси набчи хIерризурли.
- Ну, ириъван, Сабновализирад хибти асес тIашилзас: дахъ мурити леррину итди. Иш яргалис хIу рукьен, - чарбарира нуни илизи жаваб.
Чумал бархIи дикила ну хIерируси юртла мякьлар къаршидикили, Хасавюртла районнизирад хибти улелъала бадира азир къурушлис нунира асира. Дирцусини гапдирули хьалли, ириъ асибти Сабновализирадтиван илдира мурити ахIенри.
Дербентлизи виухIели, балуй шайчиб, дубурла бяхIлизиб, мерлабиубси саби Сабнова бикIуси ши. Ил шила бяхIличи хIерикIасли, наб гьандиркур дила ши-алавти мер-муса. Тяп илартигъунти дубуртала бяхIяни лер дила ши-алавси ургубализирра. ДуцIрум илар кьарлизир чедаэс вирар хIила кIунтIрачи мешути, диштIати дамкъни. Чучи гъамируцад шакиркуд илди  дамкъни улелъа диъниличи.
Дубуртазир кIел журала улелъа лерти сари. ЦадехI сулкъниван циила духъяндитIунти. Илди гьаланачир шинишли дирути сари, дилкьухIели, цахIнар хIунтIендирар. Илдас вацIала улелъа бикIар. Итдилти хъумала хIярубазир, зумати кьарлизир дашути, вацIалайчир халати журуга улелъа сари. Илди кьанни дилкьути сари. Нуша маза-масличил дуки дашухIели,  илди, бара хIунтIендиубхIели, луцIули дирехIери, нуша ил мерличи кIинайс дакIайчи чили-биалра луцIа дикIули урухкIули.
Дебали дахъал вацIала улелъа дири нушалара Иракьилара ургарти бяхIруг хъумачир! Гьанна илар гьатIира дахъал улелъа диэс гIягIнити сари: ила башуси хIяйван, я мазала мас агара.
Агь, дила виштIахIелла гIямру! Илди чардарес виралри, дуки дукибти кигьми хъярла галгала дяхIцIилиур датурли, юлдашуначил варх чедир гьандушибти хъумачив улелъали луцIули вирусири ну…
ГIуррара хьулухъунра ну улелъаличи. Наб гьанбиркусири илдала багьа гIяхIцад камбиубли бургар или. Чина хабара! Азир къурушлис лугуси улелъали бицIибси бадира 1500-лис бирцес бехIбихьиб. ХIедикиб наб ишдус Сабновала улелъара. Илдала багьара бархIилис ахъбикIес бехIбихьиб.
Ну тамашаируси нушала шагьарлизиб хIербирути вачрукьябачира. ЦIедеш биаб яра цархIил секIал биаб, сари дахъал лерхIелилра, сен циила дургIели хIедирцути илдани? ЦIедеш заядиахъес далтули сари, амма заманаличир лайикьси багьалис дирцули ахIен.
Ишди бурхIназив ну МяхIячкъалала базарличив къаршиикира. Даршал къурушлис 6 лимон лугутири, бусягIятла замана биалли - 3. Лимон балтехIе: ил дурала улкназибад бихуси цIедеш бургар. ГIянжилизиб хIербируси ванзала миликъличила гъайдикIехIе. Ил бялихъчис чараагарли гIягIниси мицIираг саби. КIел дус гьалаб миликъунани бицIибси кагъарла стакан 60-70 къурушлис бирцусири, ириъ – 80 къурушлис. Ишдус ил 100 къурушличи абикили саби, бикIар. Стаканна духIнар гIянжила къялализир лерти 60 миликъ сари. «Илди далхути секIалра доллартас исутив?» - хьарбаэс дигахъаси наб миликъуни адилкьутази.
Хала бурхIнала байрамлис дирцути берклумала багьа, бурни хIясибли, камси биэс гIягIниси саби. Нушачиб биалли байрамла гьаларти бурхIназир берк-бержла багьа бурес агарли ахъбирар. Байрумти тамандиубхIелира илдала багьа илкьяйдали кавлан.  Диъла багьа 450 къуруш саби. Ил саби наб бегIлара тамашабилзуси.
КIел баз гьалаб нуни судак бялихъ 300 къурушлис килограмм хIясибли асира. Ириъ килограмм 80 къуруш хIясибли нуни бялихъчибазибад исуси кефаль, ишдус,  савли «Кефаль! Кому кефаль?!» бикIули кьакьурбазиб къяйцIбикIути вачрукья хьунул адамтазибад 200 къурушлис килограмм хIясибли асес чебуркъуб. Ишдус, гьалабичиб убяхIбикибси долларла багьа халбаралли, кефальла килограмм 70 къурушлис бедес гIягIнисигу. Дебали дурхъадиубли сари нушачир дармунтира. Дурала улкназирад дихутицун ахIенну, нушачир дурайути дархли.
Гьарли-марли илкьяйдали саби викIес хIейрус, амма аргъира нуни нушала унраличибси Чечнялизир цалра секIа багьни ахъдуцахъес далтули ахIен бикIули. Нушачиб–декIар сен балтутира вачрукьяби чус дигуси тяхIярли масани дирцахъес?