Кайкибсиличи пяхъмайкIуд!

Октябрьла цаибти бурхIназиб телевизорлизиб чебаахъибси ца анцIбукьличила саби нуни лукIуси. Бахъ кахси, хIерикIухIели уркIилис хIейгеси сурат сабри ил: кайкибси адамличи яргали чебулхъули, кьяшмани бирхъути хIябал жагьил урши. ИмцIаливан пяхъикIуси хIунтIена спортивная формала чедиб цIудара дулгъуби агарси гIябала вегI сайри. Кайкили, селра барес хIейруси адамличи ванцIикIухIели, ил къайгъилизиври гьар бирхъуси бекIлизи чегахъес. Кайкибсини, вяхIлизи чехIейгахъес багьандан, някъ гьабуцесалра вирули ахIенри, сенкIун, сай кIинайс викIуливан, къагъли уилри.
Илдачи хIерикIуси ну, дирхаирая, «дагъистанлантилра мабиаб» викIули, Аллагьлизи улгулри. ХIедакьиб виэс ЧевяхIсини дила тиладила дугьби, илди хIябалра хIяжар Дагъистаннизибадтили уббухъун.
Илдани заядариб гIергъити дусмазир Дагъистанна дурхIназирад кадикибти лерилра гIяхIти, гIибратли диэсти баркьудлуми: Москва хIеркIлизиб кяйгIути кIел урус рурси берцахъили, сай вебкIибси МяхIячкъалализивадси Марат Рахметовла игитдешла гьунар, Серебряный Бор шагьарла мякьлабси шарализирад хасавюртлан Рашид СанахIбековли, сай алхи, урус рурси рерцахънила гьунарра. Хабаровсклизиб нушала боксертала командали цIали игуси трамвайлизибад 30-лицад адам берцахъниличилара хъумартахъур. ХIяжуртани хъумартахъур Россияла Игит МяхIяммад НурбяхIяндовла улкала полицейскийтас дурибти дугьбира. «Дузеная, узби», - викIусири ил, къачагъунани сунела бекIлизи тапанча бяхIчиаибхIелира. «Дузулра, узи», - дикIути гьарахъти урусла шагьуртазирад дакIибти полицейскийтала жавабтира дакьибти сари нуни. ГIурра гьандушес вирус нуни илдигъунти дагъистанлантала гъабзадешла гьунарти. Амма лерилра илди хъумартахъур итди хIябал адамла баркьудили. Адамти викIес вирусив илдигъунтас?
Баласра, гьанна илдала бегIти «нушала дурхIяли, чина хабара гъари, тIентIлисалра зарал хIебиру», «нушани дурхIни вайта биркьахъес бяркъурти ахIен» бикIули, илди гьалаб бузули калунти мераначибадра школабазирадра чула дурхIни гIеббурцути кагъуртагIиб умцIербашути саби. БегIтани чула дурхIни берцахъес се-дигара бируси саби. Амма нушачиб вайси бирути агара бикIни къунби сари. Вайнукьаби гьарил миллатла адамти- ургаб леб. Гьари, ца анцIбукь гьанбуршис.
ИтхIели ну 27 дус виублири. Шагьарлизи архIяличи вакIибси наб ГIярасайла ца шагьарлизи аркьуси дила шан ва гъамси юлдаш къаршиикибсири. БархIехъ ил гьунивватес поездличи ацIибси ну, берк-бержлизи вархили, поездличивад увяхIяхъес валкьхIеурра. УвяхIяхъира МяхIячкъала-1- лизив. ЦIябдиублири. Наб гIягIнисири, автобусличи кайили,  ну тIашизурси гостиницализи къалабали чарухъес.
Кисалабси гIяяркьянабала билетли гьуцIварирал яра держибти гIярякьилирил, хI****ас, ацIира мякьлаб къаршибикибси тирлизи. Илаб тIашбизурти шел-урегал жагьил уршилизи саламра бедили, Гогольла Хлестаковван, гапикIес вехIихьира ургус. ЧIянкIли дила гапла дугьби гIяярличила диэс гIягIнитири. Илди дурхIнасра гъяжбарибси гьаваличибли бузуси (пневматический) тупангла хIярхIуби асили, нуша бястлис чегахъес иртули гьанбиркур…
ХI****ас, се пикрибарибал илдани, дила дахъал арц дургар бикIули бииши, автобусличи кайэс аркьуси наб гIелабад мегьла рахажли хъяблизи бяхъилира гьанбиркур. Аргъала беткахъили биэс гIягIнилири дила, ну вяхIгьавли ванзаличи кайкира. Шел-урегал адам кьяшмани вяхIлизи бирхъулира гьанбиркур…
Сецад замана дикибал хI****ас. Илдани дила кисми умцIухIели, ну тамай чеваргъира. Паспорт дила кисала кабихьайчи уили, хапли харчизурра ва виругIев къалабали автобусуни тIашиуси мерличивяхI вебшира…
ГIергъиси бархIи ца дила юлдаш иши викIи: «Арматурала бутIнира касили, ит тирлизи аркьяхIе. Илав узуси урухварили, итди дурхIни чинаб хIербирутил бурахъехIе ва лебтасалра дирхъехIе». Итил юлдаш викIар: «Аллагьлизи улген, хIечибад вайла хIяка чебхIеберднилис. Чеббердалри, се биради хIуни ишди дугIярти бурхIназиб?». Ну, кIиибил юлдашличи лехIяхъили, шилизи чарухъунра. Дила вяхIлизирти  хьанцIдиубти мераначила хьарбаибсилизи, «поездла бугъази чегили, диубти сари» викIаси.
ВецIну верхIра дус виубхIелира тяп икI чедибсигъуна анцIбукь набчил кабикибси саби. ИлхIеликIун дяхIиличи кайкибси набчи байхъала шила жагьилти чакмачерти кьяшмани ванцIбикIутири. Илди кIелра анцIбукьлизиб набчиб халаси-декIар гIяйибра агарсири.
ГIе, жагьти дусмазир нуни дахъал къалмакъар дарибти сари, студентхIели, гIярмиялизиб къуллукъбирухIели ва цархIилти мер-мусаличирра. Амма нуни цайналра кайкибси къаршикарлис бяхъибси ахIен. Кисализиб бихули виасра, цайналра дис бурхIесра хьулхIевхъунра. ХункIачил пяхъикIуси наб 2-3 яргализир дисбира дурхIибти сари.
Рахли 74 дус виубси ну ит баягъи поездличив къаршиикасри, гьаланачиб Дагъистанна дурхIни къалмагъарли хIебиркьахъес маслигIятбираси. Илди ну ухъна адамличи лехIхIебизалри, дирхаирая бурусиличи, итдани витибси уруслан уршилис кумекбираси. Кайкибсиличи пяхъикIни дебали цIахси ва убяхIси хIянчи саби.
Наб дебали дигахъис гъудурти журала абзаначи хIерикIес, амма илхIелира, кайкибсиличи пяхъикIуси чеасли, уркIи вайтIа зимбулхъан. «Не смейте бить лежачего!» - иш саби дила гIямрула жи.