Дуралаулкаланти итули!

Иш анцIбукь кабикибсири арбякьунси даршдусла 80 ибти дусмазиб. Африкала улкназив «Азия ва Африка ишбархIи» бикIуси журналла хасси корреспондентли узуси дила юлдашли сунела отпуск МяхIячкъалализиб буркIулри. Сенрил илини набзи нушала жагьти гIямру сунезир ардякьунси тах шагьарлизи вакIахъес тиладибариб. Сут бархIи хIерейс ну МяхIячкъалализи юлдашличи ваира.
«Дагъистан» бикIуси рестораннизир кьацIли дуки, нуша Буйнакъскла  уличилси кьакьакад ита-иша къунздикIулри. ИлхIели нушани ца масхара барес пикрибарира. Ил пикри чараагарли гIямрулизиб дураберкIес гIягIнисири. Ил багьандан нуша адацIира кьакьала дублабси халаси жузала тукейзи. Арсен, набзи селра хIеили, Англияла мезли тукенчи рурсиличи дугьавизур:
- Расул ХIямзатовла «Дила Дагъистан» жуз лебу хIушачиб?
- Се дигули иш американецлис? –  чарряхъили набчи, рикIар тукенчи.
- Ишини хIушачир Расул ХIямзатовла жузи лерал хьарбиули сай, «Дила Дагъистан» ва цархIилти, - викIулра ну.
- Расул ХIямзатовла жузи дирцухIели, тукейзиб ярга бируси саби. БусягIят нушачир илди агара. Хьарбаа илизи, гIур илис чила жуз гIягIнилил, - Арсенничи хIерризурли, пишряхъили рикIар ил набзи.
- ГIяхIмадхан Абу-Бакарла жузазибад се леба? – хIеризур рурсиличи дила юлдаш.
- Камси гьалар нушани Абу-Бакарла жузи макулатурала таллонти хIясибли дицира. Чердерхая, Р.ХIямзатовлара Абу-Бакарлара жузи ишбархIи нушачир агара, - сари халаси гIяйибла регIван урузриубли, рикIар дубурлан исбагьи.
ХIера, ишгъуна ихтилат бетаурсири итхIели нушала шагьарла бегIлара бахъал адамти бируси кьакьалабси жузала тукейзиб. Ил ихтилат илаб бахъли бакьибсири.
Ишаб бурес чебиркур Англияла мез Арсенна санигIят сарри или. Нуни ДГУ-ла инфакла кIел курс делчIунтири. Ил багьандан ну жузала тукейзив халкьани ургавси журналистла тилмажли виэс бажардивикира.
Ил кьакьалабси бялихъуни дирцуси туке гьала хIедаили лерай, матросла палтар чевси жагьси урши Арсеннизи урус  мезли гъайухъун. Илини дурути гIяхIти дугьби хIедиъниличи бусягIят шакикибси ну илдачи гъамиубра. ИлхIели хIябал морякла юлдашра нушачи гъамбиуб.
Шагьарла бекIлибиубси кьакьалар къалмакъар дехIдихьиб. Нуша нушагъунти авал дурхIяличил бажардихIедиэсра асубири. Гьанна нуни бурес хIейрус, итхIели къалмакъар секьяйдали тамандирил, рахли мякьлар «Дуралаулкаланти итули!» рикIули вяврикIуси хьунул адамли тIама-гьама  ахъхIедуцибти диалри. Нушала къаршикарти ил мерличибад къалабали бебшиб.
БархIехълис нушани пикрибарира Ленинна кьакьалабси «Комсомолец» кинотеатрлизи бегIлара гIергъиси сеансличи киноличи дукьес. Асили билетунира нушара кинотеатрла гьала тIашдизурти нушачи гIурра гъамхIебиэсу баягъи итди авал урши. Иш яргалис морякра Арсенра кIарахъала мезли ахъли гъайбикIулри. Арсеничив кIарахъала мез хIедалуси ну гьалав шакикили виэс гIягIнилири морякла дила юлдашлис бяхъес кьас биъниличи, нуни илис хапли хъяйхъяйлизи бикахъира. Моряк кинотеатрла гьала бетонна кьасиличи кайкиб.
«Ну ишав милицияли уцасли, хIянчилизивад улхъасну, ваши ишарад дубшахIе!», - викIули, ну юлдашли зузварира. Нуша иларад къалабали гьарахъдикира.
ВахъхIи пикривикIаси ну, сен нуша бегI гьалар чедаибси моряклис дила юлдаш илцадра гIяхIхIелзусирив викIули. Белики, гьарахъти урхьначибси портлизив ил Америкала яра Англияла матросунани витибси урги, ва илис чис-биалра Англияла мез далусилис чеббицIес гIягIнили бурги. «Арсен сайгъуна кIарахъан виъни багьурхIелира, сен моряк вяхIес къайгъназивсири?» - гIурра суал акIуб дила. ХI****ас.