ТIабигIятла вайси аргъ хIебирар

«ТIабигIятла вайси аргъ бирхIебирар –
Гьарил бархIи саб Аллагьла баракат.
Заб диаб, дяхIи биаб – гьар дусла манзил
Саби нушаб Аллагьли гибси лигIмат».
Чедир эпиграфлизир, циила дарсдарили, гибти дугьби нуни бегI гьалар дакьибтири арбякьунси даршдусла 70 ибти дусмала ахирличир. Илди Эльдар Рязановла «Служебный роман» бикIуси кинолизиб бучIуси «Аргъличила далайла» бегI гьалабси тахтала дугьби сари. Камси заманала бухIнаб ил дебали машгьурси далайличи шурбухъун. ХIерги итхIели нушала улкализив ил далай хIебучIуси жагьил адам
«У природы нет плохой погоды –
Каждая погода благодать
Дождь ли, снег – любое время года
Надо благодарно принимать…» - сарил шипIирдикIули дучIутири кIунтIуби.
Сегъуна аргълизив, чинав къаршиикаслира, гIебшни забли ургьухIели, маза-масличил, яни дяхIили ургьуси бархIи гIяярличив, хIеблизив, чархлизибад майъала хIеркI бухъесли къялкъяличил шиниш кьарли удули, авлахъличив яра  дубурла бяхIяначив, янилизиб хъулразиб ванадеш бихIяхъес урцул кавдули, буцIарси дуцIрумла бархIи вацIализив,  нуни Эльдар Рязановла ва Андрей Петровла «Аргъличила далай» мурталра бучIули вираси.
МугIяллим виубхьар, лерилра чедир гьандушибти хIянчи нуни дирутири. Кинофильм «Служебный роман» чебиахъухIели, ну бара 30  дус виубси жагьил адам сайри. ИтхIели ну я умхIуси ахIенри, я виргIуси ахIенри, я умсуси ахIенри. ТIабигIятла гьарил аргъ нуни баракатлизи халбирусири.
 «Аргъличила далай» нуни цацахIели гьаннара бучIули вирус. Баласра: ил далай бучIас нуни гIурра, уркIи бузули лебай.
Амма ишдусла сентябрь базла гIергъити-октябрьла гьаларти бурхIназибси аргълис наб  «Аллагьла баракат» викIес гьамадли ахIен. Сентябрь баз нуни дубуртазиб, ну акIубси шилизиб, беркIира: илди дила отпускла бурхIни сарри. ГIеларти 10-15 бархIи итаб, шилизиб, чекабихьи зумаси дирихьра дирихьличил вязъалара ахIи, гIур селра хIебири. Дусла сегъуна-дигара манзил жагадилзули дииши наб дила биштIаси ши ва ил-алавти мер-муса, 30 бархIи ну илав калунра виасли.
Отпускличивад чарухъунси ну октябрь базла авэсил бархIи хIянчила дуравхъунра. Хъуливад хIянчила вашули ваэс наб 20 минут сари гIягIнити. Амма ит бархIи ну 40 минут гьунчив калунра. Шагьарла кьакьурбазирад кадухъунти варачантала ахир баргес умцIули. ВемхIурра, вяргIира, вамсурра ва ахирра ваира дила гехIъибил дерхIличибси бяргIибси кабинетлизи. ХIерила манзил хабчаб зянкърикIар: «ИшбархIи нушала азбарлаб, лебилра майданра кабуцили, байхъала метрлацад мурхьси шара леб. Ил багьандан  хIу хъули вакIес хIейрудну, хIянчилав уэн».
Ил хабчабла масхара биэс гIягIнисири. БархIехълис заб тIашдизур, шагьарла кьакьурби хIуркIбазирад датдухъун, нура хъули чарухъунра. Талат бархIи заб хIедариб. 
Амма арбягI бархIи октябрьла урегличиб нушачи халал балагь бакIиб. ХIянчила укьес кьасли дуравхъунси наб унзаличи абаибси, абзур дуги ургьути забли бетаахъурси тяп ит хабчабли бурусигъуна шара гьалабизур . Илаб тIашбизурти хьунул адамти, «Кьяш кацIес мер агарану, хIу чина аркьулри?» - бикIули, набчи дугьабизур. Унра Муслиматра шиннизивад вашуси набчи тамашали хIерризур…
«ТIабигIятла вайси аргъ бирхIебирар…» викIули, далайра  бехIбуцили, нуни хIянчила гьайбарира. Ну ила ваэс багьандан ахъес калунти ца шел-урегал «хIеркI» сарри.