Хъярбиван дуртIути ахIен

   Юрий Бондаревла «БуцIарси дяхIи» романнизиб ва ца ула кинофильмлизиб хъумхIертеси анцIбукь леб. Ил анцIбукьлизиб нушала тупала батальонна душмантала танкабачилси дяв чебиахъули саби. Савли дяви таманбиубхIели, гьалабси бархIи ва дуги ил дяви чебаибси генерал Бессонов ил кабикибси мерличи аркьули сай. Илар илини чедиули сай  дахъал заядарибти душмантала танкаби. Тамашавиубси ил мицIирли калунти ургъантагIив кьяйцIикIули сай. Ахирра баргили сай чумал бургъан. Сунени гьалавра чеибси лейтенант Кузнецовличи дугьаилзули сай:
- ХIушала батареяли заядарибтив ишди лерил танкаби?
- ГIе, товарищ генерал. Нуша ишбархIира танкабачи иртули калунра. Нушала лералти верхIел тупла хIярхIя сарри. Итди танкаби нушани даг заядарибти сари.
- Нуни барес вируси ишцун саби… Баркала танкаби заядарнилис, - викIар генерал ва дявила авлахъличир илдас ХIунтIена Байрахъла орденти дутIиб.
   Гьанбикили чедиб гьанбушибси анцIбукь, ишбархIи нуни набзи хьарбиулра: «Лебсирив генераллис дявила авлахъличир орденти дуртIес ихтияр?». «ГIе, лебсири, - нуни наб жавабра лугулра. – Блиндажлизивад хIерикIули, гьалабси бархIи илини чебаилри баягъи ит тупала батареяла дяви ва гIергъила бархIи савли – мякьлар дявила хIясилти».
Амма сегъуналра ихтияр агарси саби ца адамла, сецад ахъси тахличи сай кайили виалра, республикала бегIлара ахъти жабагъатуни сунела юлдашунас хъярбиван дутIес.
   Нушала республикала бегIлара халаси жабагъат «Дагъиста Республикала гьаларти сархибдешуни багьандан» бикIуси орден саби. Ил кабизахъурси саби 2008 ибил дусла мартла 11-личиб, ДР-ла Президентли М. ГIялиев вирухIели. ДР-ла гьалаб дебали халати сархибдешунала бегIти адамти ил орденничил шабагъатлабирути саби. 12 дусла бухIнаб орденничил 70-личир имцIа адам шабагъатлабарили саби. Гьайгьайра, илдала лугIилизиб леб бахъал шабагъатличи лайикьти адамтира: политикала зяхIматчиби, гIялимти, поэтуни ва писательти, спортсменти, далайчиби, журналистуни ва  цархIилти. Дила пикрили, республикала чебяхIси шабагъатличи лайикьхIебиркути адамтира илдала лугIилизиб леб бургар. ХIебиэсра хIебирар, сенкIун ца 2016 ибил дуслизир Дагъиста БекIли 23 адамлис республикала бегIлара ахъти наградаби дутIибтири. Иличила  Интернетлизибси белкI нуни гьалабван белчIунра.
   Нуни иларти макьалаби дучIухIели, шабагъатлабарибтала ургаб цалра ялчила ва хъубзарла, дояркала ва букIунна, школала учительла, трактористла ва комбайнерла уми къаршихIедикиб. АйкIули саби ишгъуна суал: «Челябкьути наслуби руркъути, хъуми далцути ва анкIи сархути, маза ва хIяйванти адилкьути, фабрик-завод дузахъути – нушаб чараагарли гIягIнити адамти нушала ургаб агартирив?» Советский Союзла замана илдигъунти адамтиригу имцIалин шабагъатлабирути.
   Гьари гьанбуршисра ишаб нуни балути, дила районнизиб ва биштIаси шилизиб ахъти наградабачи лайикьбикибти  адамти. ГIяштила шилизивадси хала букIун Гилал МусахIяжиевлис Социалист Бузерила Игитла у бедибсири. БукIуни Дауд Кьурбанов (Зубанчи) ва МяхIяммад Мустапаев (Уркарах) Ленинна орденничил шабагъатлабарибтири. Мирзабеков Мирзабеклис кIел Бузерила Асилдешла орденти дедибтири. Гьанбиркур наб: 2-3 орден дихан дугIахъарлан МТФ-ла бригадир Зугьрат ХIямидова 19 ибил партсъездличи делегатли Москвализи рархьили.
   ХIукуматла шабагъатуначи лайикьбикибти дила шантира гьанбуршис. Гьаланачиб бурисра Бузерила ХIунтIена Байрахъла орденничил шабагъатлабарибти. Илди саби Ибрагьим ГIямаров (ТIуртIур) ва ГIяли Маммаев (Къингуй). ТIуртIурлис орден ябни адикьнилис бедибсири, Къингуйла ГIяли букIун вирусири. Учитель Ази Хасбулатов ва букIун ХIяжи СалихIов «ХIурматла Лишан» орденничил шабагъатлабарибтири. Шофер Халимбек Абакаровлара, дила шан, «Ирагъинский» совхозла директор ХIусин Рабазановлара ва хIенкьула ГIябдулкьадир ХIясайниевлара лертири орденти. Колхозла хала букIун МяхIяммад Ражабов ва мугIяллим ХIяжи Ибрагьимов Дагъиста Правительствола ХIурматла Грамотабачил шабагъатлаварибти саби. Илдала къяяназив гьануршисра ца гьатIи адам. Ил, учительли узули, Бузерила Асилдешла орден сархибси, ну сайра.
   Иш макьала белкIи таманбирухIели, хьулухъунра ну Интернетлизи хIеризес: наб чараагарли багьес дигули увухъунра, чум орден лерал камси гьалав нушачив халаси хIякимли калунси ца дила зиланна. Илала верхIел (!!!) цайчирра ца мягIничерти орден лерли сари. БегIла гIергъи касибси орденна у белчIунхIели, ну бурес хIейэсли тамашавиубра: «Селис лугусирив илис Александр Невскийла орден? Белики, нушани хI****ули, ил чевяхIси сардар урги».