Ублайчила шишимти

 Арбякьунси жумягIла ца бархIи зянкъбухъун телефон:
- ХIяжимурад сайрив? – бикьулра урус мезли хьарикIусила суал.
- ГIе, сайра, - викIулра. – ХIу чи сайри?
- ГIялихIяжи Ахъушинский сайра, - викIар гIурра урус мезли.
- ГIялихIяжи Ахъушинскийла уличилси бягIуси кьакьи леб нушала шагьарлизиб. Ил лебни баласра, амма ГIялихIяжичил тянишиэс кьадархIебиуб, - викIулра, масхараличи шурбалтули ихтилат.
   ГъайикIусини дила масхара хIергъиб виэс, иш гьакIлис ил набзи дарган мезличил дугьалзули сай:
- Марлира, Мурад, хIунира хъумкартурлирав ну, хIела юлдаш гIяйнихъяблан ГIялихIяжи?
   Сен хъумуртусив нуни набчил вархли ца курслизив авал дус Сергокъалала педучилищелизив ва кIинайс кIел дус дикила  гIергъи МяхIячкъалализивра варх учIуси юлдаш? Нуша республикала тах шагьарлизирра, камси замана биалра, ца хъулир хIердирули калунти  диахIелри? ИтхIели ну ДГУ-ла дурала улкнала мез руркъяхъуси факультетлизив учIулри, ГIялихIяжи – ДГПИ-ла тяп илгъуна факультетлизив. Нуни Англияла мез руркъутири, ГIялихIяжини – Францияла. Общежитиебазир нушаб мерани дикайчи, нуша кIелра, ца цIудхъра вегIдешла юртлизибси хъали буцили,  хIердирутири. ИтхIели дила юлдашлис, ил ахъирули, ГIялихIяжи Ахъушинский викIусири. Дила пикрили, нуни сай дурхъаси,  хабарла ГIялихIяжичил мешуурцни юлдашлис гIяхIбилзусири.
   Баягъи ил Ахъушала шила мякьлабси ГIяйнихъяб бикIуси махьилизивадси ГIялихIяжи уилри ишди бурхIназив набчи зянкъикIуси. «Ахъушар дам дяхъялли, гIяйнихъябланти делхъли булхъути саби», - викIули вири ил итди гьарахъти дусмазив. Нуни сай чинавад зянкъикIулил хьарбаибхIели, «сурс-кьакьари изули больницализив сайра», «хIу чеваэс дигулрану, набчи гьаввакIи», - викIар. «Лявкьяс, -ира нуни, - сут бархIи лявкьяс».
   ГIур пикриухъунра: «Авалра байхъалара баз, «яра хIу зягIипиркуд, яра хIуни царилти зягIипбиркахъид» бикIули, хIянчила хIешахъуси ну  секьяйда укьяша тамай коронавирусла изайзи бикибтазибад бацIхIебухъунси больницализи. Къяна хIебурис, ну урухиубра. КIиэсилра: нукIун шадлихъуначира мукъри-сяхIбатуначира вашулра, хIебиалли нуни, чейхъуси изала бихуси ветаурли, юлдаш зягIипикахъесра асубирар. Мурманская областьлизивад узичи гIяхIладли вакIибси илис нуни балу-балули зарал бирули уилрагу. ГIялихIяжи  набчи ваши или живикIулри, нуни се бирусил балули ахIенри. Ахирра, сут бархIи, спиртли дирцили някъбира, вяхIличи баршили дяхIликалара, базарличибад асили ца харбузра, таксиличи кайили, гьайбарира больницализи юлдашличи. «ИшбархIи чехIеасли, биркур гIур ил чеваэс, яра хIебиркур, - шивкIивикIулри набзи ну. – Нуйчив ил авал дус халаси сай, хIебиалли цугли 77 дус виубли сай. Нушагъунти бухънабачи саби  коронавирусли тамай гуж бирусира».
   РЦКБ-ла азбарлав, галгала дяхIцIилиу скамейкаличи кайили, хIерлира ГIялихIяжичи. Камси заманали ила дакIуухъи, алав-гьалавти адамтачи хIерикIуси ухъназив  юлдаш вагьурли, набчи гъамиахъес ну илизи живикIулра.
- Кьакьанив къаршивикили виадри, хIу нуни хIевагьесра асубири, -  викIар ГIялихIяжи. - «Молодежь Дагестана» газетала редакциялизи зянкъдяхъили, багьурра хIела телефон. Сен хIед ХIяжимурад рикIусири ил газетала редакциялизирси секретарь Роза? Гьалар кьалли нуша хIед Мурад дикIутири.
- ВяхI! Лерилра гIямру хIуни Ахъушан ГIялихIяжила у бихес ихтияр лебли, наб ухънаваибхIелилра имам Шамилла наиб  ХIяжимурадла у бихес асухIебирусив? Дила паспортлизи белкIунсира ХIяжимурад сабгу. Нуша дагъистанлантас, ГIялихIяжила уван, ХIяжимурадлара дурхъасигу…
   ГIялихIяжи сурс-кьакьарилизиб бакIибси умхси ва шинкIадешличилси бакIри (киста) убасахъес ЛОР отделениелизи кайхьири. Мурманскла областьлизив хъалибаргличил хIерируси ил, гьар мурталраван, ишдусра Къизларла районна Калиновка шилизи узичи гIяхIладли вакIилри. Мартличив вакIибси, коронавируслизибадси урехили августличи бикайчи узила хъуливад дуравхъес хIейублири.
   Бархьли бурасли, ит бархIи нушала гIяхIси ихтилат бетхIеур. ДяхIликала вяхIличибси ну юлдашлис гIяхIхIейзниличи шакикира ургус ва, ца сягIят дикили гIергъи, юлдашла някъра буцили, гьунби гIяхIдираб или, хъули арякьунра. Балулра: нуни барибси балкIари, илгъуна биэси ахIенри 50 дусцадхIи къаршихIебикибти юлдашунала гьунибаъни.  Амма… ГIур се бирусири нуни пиволра хIебужуси, бара гьалав тухтур сурс-кьакьарилизив халтIухъи гIергъи чумал сягIят кьацIли укес асухIебируси юлдашличил ?
   Ну арукьес гьалав, кисалабад касили, юлдашли  набзи тетрадьла кIапIи гьабуциб, «хIушала газетализи иш дила назму кабяхъаягу» викIули. Нуни назму белчIунра, наб ил гIяхIбизур. Нуни ил, селра барсхIебарили, авторли белкIунси тяхIярли нушала газетализи кабяхъяхъира. Белики, цаялра гIяйнихъябланни ил белчIес ва гьаникес чула ГIялихIяжи.