Анищал раг1адлъун г1едег1ун уна,
Дун гьезда г1айибал ч1валев чи гуро.
Чарал раг1абазул дунял ц1ун буго,
Божилев лъида дун,бице бокьарас.
Бук1инадай маг1на нилъер г1умрудал,
Г1инкъалги,бецалги г1емер ругони.
Рит1укълъи т1екълъиялъ къезеги гьабун,
Къайи хисун бугин бат1аго бахъун.
Бут1рул г1акълуялъул ц1урал рук1унищ,
Ц1ар лъезе лъаларел ишал гьарулел?
Гьурмада нич гьеч1о,ч1ух1иялъ буго,
Рек1ел иман бух1ун х1асад гьабулеб.
Сундуе нилъеца хвелал гьарулел,
Хвезе рук1инг1аги лъалеб бук1аго?
Лъик1азул лъак1алъул къимат холаро,
Халкъалъе мисаллъун хут1ула даим.
Анищал,анищал лъуг1иго гьеч1ел,
Шайт1аналъул г1амал г1умруялда гъорлъ.
Г1одуларел берал,кант1улареб рак1,
Кинаб мун кант1улеб калам гьабилеб?
2011 сон
Кант1изе ккела
© Copyright: Муртаза Игали, 2026
Свидетельство о публикации №226091900579
Свидетельство о публикации №226091900579
Рецензии