Сен къантIти дирутира?

Гьар мурталра нушала шила хIябразив къаршиикибхIели, ну бебкIибтала хIябрачирти цIелдубачи хIерикIули вирус. Илдазир нуни бегI гьалар чедиути акIнила ва вебкIнила   дусми дирар. Илди нуни ну акIнила дусмачил цугдурцули вирус. «Наб гIур чум дус лералара хIерирэс иш дунъяличив? Наб се барес валкьаэс гIягIниси?», - имцIаливан илдигъунти пикруми дашар бекIлизи.   
Гьачам вебкIибси дила шан хIяриирхьухIели, хIябразир мякьлар къаршидикибтири нушала вахъхIила учитель Амирбек ХIясановра, дила виштIаси узи СягIидра, нура. Гьанна илди кIелра нушачил бархли агара, Аллагь бунагь-хатIаличивад чевверхаб чулану.
Тяп дилагъунти пикруми дашули дурги итхIели дила узила бекIлизира. Ну иличи шакикира, хабарагарли ил Амирбек ХIясановичличи ишди дугьбачил дугьаизурхIели: «Гьари, хIеризи икIди нушала поэтунала цIелдубачи, хIурматла Амирбек ХIясанович. Илдазивад цалра 65 дус виайчи кали ахIен. Нуни балуси саби хIунира назмурти лукIниличила. Поэтунала гIямру къантIти дирути сарину, малукIад назмурти».
СягIидли илди гъай масхаралис дурибтири, амма…дебали дархьтили  урдухъун илини дурибти дугьби. Авал дибгашан лебтири 20-ибил даршдусла кIиибил байхъайзиб назмуртани, хабуртани лукIути, амма цалра илди сагаси даршдуслизи абацIес кахIелун. Дагъистанна халкьла поэт Сулайбан Рабаданов 63 дус сайри иш дунъяличив калунси, поэт ХIусин Рабазановла гIямрула гьуни 62 дусла сабри. Поэт, писатель ва драматург, ГIямарла Батирайла у бихуси Даргала музыкала ва драмала театрла гIяртист ХIябиб Наврузовлис ЧевяхIсини гибти 53 дусцун сарри. Писатель, СССР-ла журналистунала Союзла член МяхIяммад Кьадиев, 54 дус виубхIели, нушачивад арякьун.
Дибгашила урга даражала школала жаняхIла бяхIлизиб илди авалра адамлис багъишлабарибси дила «Нушала хIябразир хIябрачир цIелдни» бикIуси назмуличилси уркьули лебси саби. Ил уркьуйзир лер авалра лукIути дибгашантала суратунира илди акIубти ва бебкIибти дусмачилти белкIанира.
«Дургъбала дурхIни» сабри илди авалра дила шанра. Гьари, нуни балуси тяхIярли бурисра газета бучIантас, чи сабил дургъбала дурхIни.
1928 ибил дусла июньна 22-личибад 1945 ибил дусла сентябрьличи бикайчи акIубти, СССР-лизиб хIербирути биштIатас «дургъбала дурхIни» бикIути саби. Илдала дурхIядеш агартири. Илди имцIаливан гушли ва бяргIили бирутири. Гашазибад хIебебкIес багьандан, илдани гьарил хIянчи бирусири. ИмцIаливан дахъал хIянчи дариб илдани ЧебяхIси ВатIа дергъла замана, ярагъ дурайути заводуназиб, колхозуназиб дуги-хIери хIеили бузули. ЦацабехIти партизантала отрядуназиб бургъулира калунтири.
ГIе, лер илдас камти кункдешунира: пенсияличи имцIабарибси камси арц Белгородла областьлизиб ил 700 къуруш саби, хIукуматла машинабачиб арц хIегили башни, камси багьалис цулби кадалтни, дурхъати дармунти камси багьалис дедлугни, гьар дусли, больницализи каркьили, арадеш къулайбирни ва цархIилтира. Илди кункдешунира нушала улкала 20 регионнизир сари лерти. Нушала хIукуматла ил анцIбукьла чебкад кабизахъурси хIукмура агара.
Дургъбала дурхIнири 70-90 ибти дусмазиб бегIлара бурибти даргала поэтуни ва писательти: 59 дусцун виубли, гIямрулизивад арякьунси,   машгьурси писатель ГIяхIмадхан Абу-Бакар ва гьатIира камли дунъяличив калунси илала виштIал узи МяхIяммад Абакаров; 52 дусцун виубхIели, ахиратлизи хьуравиубси хIурхъан поэт ва писатель ХIябиб ГIялиев, 60 дус виубхIели, сунела назмуртачи гIяшикьти нуша дархьдатурли арякьунси Амир Гъази ва микIхIен Гъазимбек БяхIяндов.
60 дусалра иш дунъяличиб кахIели, селис арбякьунтири илди нушачибад? Илди агархIели мискинбиублигу даргала поэзия! Сен биркутири илди илцадра ряхIмуагарти  излумази? Се сартив мурул адамлис 50-60 дус?
Дургъбала замана диубти къияндешунани дакIударибти дурги «дургъбала дурхIнала» назикти чурхразир декIти зягIипдеш. Саби шакалра хIебикахъили, баягъи итди зягIипдешли бахъ жявли арбукибти бурги илди нушачибад.